Nun ye Tito Bustillo nin Altamira pero tien un valir importante. La cueva de La Fresnera, fecha pol alumnáu de 1º de ESO nun aula del nuevo institutu de La Fresneda, propón un viaxe nel tiempu, al arte paleolíticu, a dellos intres nos que la caza y la so representación nes muries entamaron a relatar el mou de vida del ser humanu. “Na cueva yéremos como seres prehistóricos”, diz Nel Modroño. “Tábemos naquella dómina, podía imaxinar lo que sentíen na Prehistoria”, añede Rodrigo Huan Cuevas.

La xera de construir una cueva foi idea de Alejandro Fernández, profesor de Historia, y de Lorena Lozano, de Plástica. Dambos dieron-y vida a una de les aules ensin usu del centro. L’alumnáu volcóse nel proyeutu y ente toos cubrieron les paredes con papel d’estraza marrón y taparon les ventanas pa trabayar cola lluz xusta, como nes cueves. Nun emplegaron grasa animal pa los dibuxos de bisontes, caballos y otres especies, delles desaniciaes. L’alumnáu averóse entós a esos tiempos prehistóricos con carboncillos y sepia, que da-y esos tonos más escuros asemeyaos al marrón.

L’alumnáu tuvo tiempu tamién pa dexar la so buelga de les manes nes paredes de la cueva. “Lo más prestoso foi pintar colos carboncillos porque yera como los dibuxos orixinales de les cueves”, cunta Sofía Fernández.

“Ye un trabayu d’arqueoloxía esperimental, más cenciello”, desplica el profesor d’Historia qu’entamó el proyeutu. Agora, tres meses d’investigación nel aula y na cueva, l’alumnáu afondará nel estudiu de la Prehistoria con otros elementos. “Trabayaremos l’abstracción y fadremos símbolos, ye dicir, el proyeutu sigui, crearemos pigmentos propios y con presees y ferramientes simples”, cunta Lozano, tres una fondera investigación sobre arte paleolíticu. “La cueva foi una idea perprestosa y creativa, dibuxar féxome sentir como daquién del pasáu”, finó Illán López.