Aición. La claqueta furrula nel IES Fernández Vallín de Xixón. L’alumnáu matriculáu en llingua asturiana averóse nes caberes selmanes a l’alfabetización audiovisual, a facer guiones, lluvies d’idees y dellos curtiumetraxes nos qu’afonden temes trataos en clas y maxinen histories que-yos presten. Pel momentu, yá encolingaron dalgunes de les sos propuestes na red social Youtube y amás de vídeos sobre les pallabres que-yos presten más o refranes, denuncien ún de los problemes que dellos escolinos sufren, como ye l’acosu escolar. “L’acosu nun ye un xuegu”, dexen bien claro nel so curtiu de dalgo menos de trés minutos. Lo que sí ye un xuegu o, polo menos, tómenlo asina ye’l curtiu nel que falen de zombis, qu’entá ta ensin finar.

El profesor ye Inaciu Galán. Desplica que les temátiques fueron surdiendo en clas y tamién cola collaboración de les families. Refierse al vídeu de los refranes. Dellos dichos que los escolinos apurrieron al curtiu los sintíen en casa. “Púdote más el güeyu que’l butiellu” ye ún y otru esi que diz que “Depués de vieyu, gaiteru” y asina hasta una bona riestra refranes.

Daqué apaecíu pasó col curtiumetraxe “Pallabres”. L’alumnáu escoyía una pallabra y desplicaba’l so significáu. Nel vídeu, los escolinos falen de “melandru”, “raposu”, “llingua”, “señardá” y tamién “tracamundiar”, “escaecer” y “alcordanza”, ente otres.

Hebo tiempu tamién pa grabar un vídeo d’un recitáu colectivu de parte d’una obra de Daniel García Granda, “Versos d’Asturies”, na que los escolinos entonaben a cámara delles ringleres del autor polesu. Y, tamién, animaben a los espectadores de la so creación a encolingar poesíes recitaes nes redes sociales.

Demientres, unos nun teníen problemes pa salir nos vídeos, otros, más paradinos, preferíen facer otres xeres bien necesaries na producción audiovisual como ye la de grabar cola cámara. D’esa manera, l’alumnáu fixo equipu y demostró que ta enforma preparáu pa desendolcar proyeutos más grandes, non solo na clas. Y eso sí, col emplegu de la llingua asturiana y sabiendo lo que ye un planu mediu, un planu secuencia y dellos otros, que sirvieron-yos p’afitar les lleiciones deprendíes en clas. Y ente otres obres, la reciella animó a matriculase n’asturianu pal prósimu añu y desendolcar esta y otres xeres pa espardir l’idioma d’Antón de Marirreguera.