El colexu Gloria Rodríguez de Sotu’l Barcu ye un parque temáticu de la Historia. Cada cursu estudia y deprende una etapa, dende la Prehistoria hasta la Edá Contemporánea. Asina, por exemplu, los pasiellos de la planta baxa del centru amuesen una cueva prehistórica, fecha pola reciella d’Infantil y Segundu de Primaria. Y los de Primeru afonden na Edá Antigua, la de les grandes civilizaciones, como la romana, la exipcia y la griega. A los de tercer y cuartu cursos dio-yos por los castiellos medievales y el feudalismu, mientres l’alumnáu de quintu conoz la conquista d’América por Colón qu’afita l’entamu de la Edá Moderna, col so Renacimientu y Barrocu artísticos. Los de sestu, los mayores del cole, estudien la Edá Contemporánea, la que principia cola Revolución francesa y la perda de poder de los reis, marcada pol movimientu ilustráu y llega a los nuestros díes.
Esti proyeutu de centru surde depués de que n’años anteriores l’alumnáu estudiara l’Universu, el continente americanu, África, Asia y Europa.
Les families sofiten a la reciella colos sos trabayos, echen un gabitu nes esposiciones feches nos pasiellos del centru, que son almiraes por tol alumnáu, que si bien deprende sobre la Edá Media puede interesase pola Edá Moderna, por poner un exemplu. Les paredes del centru planteguen un viaxe per más de dos mil años, y eses imaxes, dibuxos y pieces son colgaes na interné, nel blog del colexu Gloria Rodríguez de Sotu’l Barcu, pa que tol mundu deprenda como ellos sobre les etapes de la Historia.
Les xeres de clas son bien prestoses. Los neños deprenden xugando con pequeñes pieces del gran rompecabeces que ye la historia universal, faen escudos, vístense como si tovieren na Edá del Fierru, construin armadures y castiellos y dexen esnalar el so maxín. Esnala que t’esnala, l’alumnáu del centru tien entá pendiente una salida escolar. Los pequeños visitarán una de les xoyes arquitectóniques del so conceyu, el castiellu de San Martín, asitiáu bien cerca del colexu. El centru nun tien fecha afitada pa la escursión, pero sí tienla planificada. Los escolinos saldrán del colexu a pie fasta aportar al castiellu. De camín, l’alumnáu más mozu tará vixilante de los más neños, curiándolos pa face-yos el camín más afayadizu.
El guía d’esta ruta será Jaime Pérez Lorente, magar que tol mundu lu conoz por “Jimi”. Ye policía local y un gran conocedor de la historia del conceyu. Sedrá l’encargáu de cuntar una hestoria pa viaxar a los tiempos de castiellos, d’armadures, de nobles y doncelles, como los rapacinos faen nel colexu, pero, esta vegada, conociendo de primer manu una construcción que munchos de los escolinos ven tolos díes de la que van a clas.
