Con piragües y remos de cartón y traxes fechos con bolses de basura, los alumnos del colexu San Miguel de Xixón vistieron ayeri de gala pa tornar a una celebración que se considera yá tradición del centru: un descensu simuláu del Seya con alumnos d’Infantil na redolada del parque que llenda col colexu. Los alredor de 150 participantes d’esti añu, toos d’ente 3 y 5 años, tuvieron encabezaos por alumnos de 2.u d’ESO, organizadores del eventu. “Al ser tan pequeños, con esto del covid casi nun pudieron facer actividá nenguna col colexu. Fai-yos muncha ilusión”, aseguraba l’alumna Xira Menéndez, una de les estudiantes organizadores.

El “Descensu” fíxose coles piragües suxetes a los pequeños por unos tirantes y dando un par de vueltes al parque de la Urgisa, asitiáu xusto en frente del colexu. L’actividá celebra esti añu la so cuarta edición, depués de dos años de parón pola pandemia, y foi idea de los docentes Roberto Fernández y Marián Viña, profesores de Tecnoloxía y Educación Física, respeutivamente. Esta postrera ye una avezada piragüista, ya que ganó’l Descensu en 1995. “Pa un piragüista ye perespecial poder entamar esti tipu d’actividaes. Tol colexu ta enxareyáu”, agradeció. Les piraguas tán feches de cartón y munches, según esplicó Menéndez, reutilizáronse d’otros años. “Tuvimos un mes enteru iguándoles”, aseguró. “Sabemos qu’a los pequeños fai-yos muncha ilusión”, añadía Noelia Flores, otra de les organizadores de segundu cursu.

A esta pequeña carrera allegaron dellos representantes del Descensu oficial, qu’actuaron como tutores de los estudiantes. Amarutáu y cola so traenta de tritón taba Ángel Luis Menéndez, presidente de l’Asociación de Tritones de Piloña. “Esti ye l’únicu colexu d’Asturies qu’enseña d’esta manera la esencia del Seya. Nin los colexos de ribera lo faen. Y ye fundamental, porque’l Seya lo que tien ye que, si participes una vegada y te presta, engánchate. Animamos a tolos padres a que traigan a los sos fíos al Descensu un añu, más que nada por que lu prueben”, señalaba.

Juan Manuel Feliz, presidente del Comité Organizador del Descensu Internacional del Seya (Codis), añadió: “Ye importante facer visible’l Seya a los deportistes, pero tamién a los neños. Afalar esta cosa tan asturiana dende embaxo ye un estímulu pa caltener viva la esencia del Seya”.

A lo último, Alberto Estrada, de l’Asociación d’Amigos de Dionisio de la Huerta, apurrió a los dos docentes y a la directora del centru, Ana Isabel Calvo, un cartel conmemorativu de la celebración. “Lo que fai’l San Miguel nun lo fai nengún otru colexu d’España”, aplaudió.