«Na granxa de Nel pasen coses mui rares, agora vais ver, mirai que vos paez». Esos versos que tornaron en cantares tienen «más años yá que la campanona de la catedral» como el «coche’l maestru» y «la moto que tien Pachín» que «ye una moto de primera». Eses frases son cosa de Nacho Fonseca, uno de los padres de la normalización llingüística d’Asturies dende la escuela pública. En 1986 entamó un proyeutu qu’entá sigue vivo nes aules asturianes, ye más, por exemplu, «Una de mieu» y «Na granxa de Nel», ente otres, son dos de los temes qu’escribiera va más de trenta años y siguen teniendo el so públicu nes escueles y fuera d’elles.
Fonseca principió’l so llabor llingüiísticu-musical na escuela de Porrúa (Llanes), Montó un corín de neños y neñes, llamáronse «Seliquín» y depués, col tiempu formó «Xentiquina» en Lieres (Siero). «D’aquella nun esistíen materiales didácticos n’asturianu y había qu’aportar, pensé que a los rapacinos de seis años, canten bien o mal, a toos yos presta cantar y lu echamos a andar», diz Fonseca, ya xubiláu.
Un xunta de dellos colexos asturianos n’Uviéu abrió les puertes del éxitu a los rapacinos de Porrúa. «Garramos el mio coche y un taxi y fuimos toos apretaos a aquel alcuentru, dibemos con doce o trece neños. Nun hai desplicación neguna pero toos cantaben bien, teníen bona oreya». Nesa xunta taben Antonio Trevín, que yera director xeneral de Educación y Pedro de Silva como presidente del Principáu. «Cantamos cuatro temes, ellí taba Lisardo Lombardía que yera sociu de la Fonográfica asturiana y díxome: ‘hai que grabar un discu’. D’aquella solo grababen discu n’Asturies ‘Nuberu’, Víctor Manuel, ‘Ilegales’ y nós», comenta’l maestru que tornó pa Porrúa con daqué increyible, los rapacinos de la escuela de Porrúa diben grabar un discu y n’asturianu.
L’humor y la humanización d’animales yeren pieces clave p’a verar a más neños a les clases de llingua asturiana y Fonseca teníalo claro. «Grabemos con Pedro Bastarrica nun día, venti temes nun día, cantaben tan bien que nun tuvimos que repertir», diz Fonseca entá ilusionáu pesie a que pasaren 36 años. «El primer discu de Seliquín tuvo una perbona repercusión y tamién fuera del asturianismu», espón. Y ye que les families viaxaben con «La otra tabla», «El pitín» en el radio cassette del coche de los padres y «quemaben» les cintes de tanto escuchales. Daquella nun esistíen los cds y los discos de «Seliquín» y «Xentiquina» editábense tamién en formatu vinilu.
Les composiciones de Nacho Fonseca marcaron a la primer xeneración d’escolinos d’Asturianu, qu’anguaño ronden los cuarenta y pocos años. «Pa munchos foi’l primer contautu cola llingua asturiana y valió-yos pa deprender les primeres palabres d’esi mou agradable, con cantares de y pa rapacinos», afonda l’inventor d’esti xéneru musical.
Col tiempu, esa xeneración d’asturianos que suañó y medró col «Cuando yo seya grande», «El cañicón», «Andolina», «La primavera» o «Llueve» llegó a grabar un discu homenaxe a Fonseca, coincidió col añu de la so xubilación, 2011 y titulóse «Xentiquina crew» y cuntó con versiones d’esos clásicos qu’anovaron «Dixebra», «Los Berrones», Anabel Santiago, «Skama la rede», ente otros. «Yeren músicos d’estilos estremaos y prestóme pola vida», cunta Fonseca, que nun ye quien a escoyer el tema que más y prestó componer. Quiciabes, diz, foi «L’escolín primerizu»: «Too porque falaba d’un nenu, el mio fiu Nachín qu’anda ya polos cuarenta años, cuando tenía trés y diba en transporte públicu dende Porrúa a Llanes y amás, la voz d’esi cantar yera la mio fía Esther cuando tenía cinco».
El maestru d’Asturianu y músicu Nacho Fonseca camienta n’aquellos años y sal-y una sorrisa. Esfrutó como pocos d’un proyeutu que yera musical pero non solo, que sirvió pa que munchos escolinos y escolines d’Asturies daquella dómina de los años ochenta estudiaren nuna llingua que daba los sos primeros pasos na escuela pública asturiana al empar de la so normalización social.
