El calecimientu global ye daqué qu’esmolez a escala mundial y tamién a los escolinos del colexu Maestra Humbelina Alonso Carreño, en Muros. Ye más, l’alumnáu de Tercer cursu d’esti centru del Baxu Nalón axunta un grupu de "detectives climáticos", con capacidá pa investigar y biltar delles propuestes qu’afonden na necesidá de xenerar una "conciencia ecosocial". Los escolinos de Muros non solo estudien les llaceries de la emerxencia climática na son contorna, que tamién, sinon les del mundu. Ye más una de les sos investigaciones céntrase na perda de xelu en Groenlandia, la islla que ocupa bona parte del hemisferiu norte en plenu Atlánticu, y la consecuente xubida del nivel del mar.
"Ye un trabayu reflexivu, d’intentar responder a delles entrugues sobro’l calecimientu global, nún panel llantáu na parede de clas ponemos les xeres, tenemos tamién lentes y gafes, xugamos y facemos maxa", diz el tutor de Tercer cursu del Maestra Humbelina Alonso Carreño, Jesús Carlos Barriga, que destacó l’enfotu del alumnáu en formase, informase alrodiu d’un calecimientu global que ruempe cola vida d’especies d’animales d’estremaos llugares del planeta, desde les fasteres más ermas hasta les selvátiques.
L’alumnáu restola pela rede, al traviés d’Internet, qué ye la capa d’ozono, les causes y consecuencias del efectu invernaderu así como del dióxidu de carbono. "Planteguen soluciones cencielles como afondar nel usu del tresporte públicu y el fechu d’aminorgar la velocidá nes carreteres cola fin de protexer más l’entornu", afonda Jesús Carlos Barriga, so’l trabayu del so alumnáu.
El calecimientu global tien que ver muncho coles temperatures y que na seronda malapenes caiga orpín, orbayu o dalgún bastiazu d’agua y qu’eso faiga qu’espoxiguen les nomaes "piedres de la fame", que ye un marcador del nivel de les agües común n’Europa Central y servíen como señes de les époques de seca. "Evidencies hailes tolos díes y l’alumnáu sábelo y ta concienciáu porque tienen poco pasáu pero muncho futuru", conclui Barriga.
