La seronda n’Asturies ye tiempu d’amagüestos, de castañes y de la primer sidra del añu, la del duernu. L’alumnáu de La Escuelona de Xixón sábelu perbién y más esti añu, que valtió tolos récords d’escanciáu simultaneu de sidra escolar con 172 participantes. Les botelles nun yeren de vidriu, sinón de cartón, y los escolinos facíen el xestu del brazu n’altu; nun hebía llíquidu nengún, pero sí un sofitu perclaru a una de les señes d’identidá d’Asturies. "Esti actu tien muncha fama nos branos en Poniente, equí en Xixón, y parecionos bien guapu dalu a conocer al alumnáu y a la nuestra manera", desplica la mayestra d’Asturianu, Alma Pérez Chust, una de les impulsores de la propuesta, na que tamién participaren la tutora de primer cursu, Natividad Cortázar Leniz, y la organizadora de los xuegos tradicionales y populares, Lorena Delgado Raimúndez.
Nel Guinness del "falsu" escanciáu simultaneu, cada rapacín cuntaba con una pegadiella p’asina fixar el contéu de participantes final. "Lo más prestoso d’esta xuntanza foi lo muncho qu’esfrutraron toos xuntos d’esti día, dende los más pequeños hasta l’alumnáu de sestu, que colaboró enforma ayudando a preparar les monteres y les botellines", afonda la maestra d’Asturianu.
La xornada principió con xuegos tradicionales, pa depués siguir cola llectura del pregón, que cuntó coles voces de cuatro escolinos de sestu. Ente toos cantaron l’himnu d’Asturies, y los mayores baillaron al ritmu de "La danza", tema del grupu "Dixebra". Tamién hebo tiempu pa enllenar el bandullu, non con castañes sinón con bollos preñaos y zume de mazana
"Somos una escuela con gran diversidá intercultural, poro nun dexamos d’aprovechar cualisquier oportunidá pa esfrutar col nuestru alumnáu con daqué tan guapo como nuestros vezos y costumes de la tierra, y tratar d’afitalos", diz la maestra d’Asturianu d’una folixa como la del día 17 de payares, na que hebo Récord Guinness d’escanciáu simultaneu y una bona bayura d’actividaes propies de la seronda.
