"Poetavisión" enancha fronteres dende Candás

El colexu Poeta Antón de Marirreguera entamó col alumnáu un festival similar a Eurovisión, que ganó Galicia y nel que compitió’l pueblu xitanu

1. Los representantes de Galicia, en plena actuación. 2. Cantar del pueblu xitanu. 3. Representantes de Sudáfrica. 4. Representantes de Rusia. 5. Los ganadores, colos sos premios. 6. El xuráu. / Candás, Illán García

Candás 10 ENE 2023 4:00

Nun ye Eurovisión y ye muncho más qu’un festival de cantares que representen a dellos territorios. Nel colexu Poeta Antón de Marirreguera de Candás entamaron un concursu nel que los escolinos de quintu teníen que salir al escenariu, escoyer un país, comunidá autónoma o diferentes cultures o etnies y representalu con bases musicales y micros. Too llamóse "Poetavisión". Hebo representantes de Galicia, el pueblu xitanu, Italia, Estaos Xuníos, Reinu Xuníu, Rusia, Canadá, Sudáfrica, Méxicu y tamién d’España. El ganador foi Galicia.

"Poetavisión" enancha fronteres dende Candás / Candás, Illán García

El festival cuntó con presentaciones en dellos idiomes, nos más afayadizos pa un centru como’l candasín, ye dicir, el castellán, l’asturianu y l’inglés, esti caberu porque foi onde surdió esta iniciativa y porque tamién ye una llingua "de comunicación ente diferentes cultures". "Poetavisión" enllenó d’actividá los últimos díes de clas del añu pasáu y cuntó col sofitu de bona parte del alumnáu del centru, ya que los y les delegaes de segundu, terceru, cuartu y sextu fixeron les veces de xuráu. Los rapacinos grabaron vídeos pa ser vistos na gala y restolaron información pela rede p’añedir a les sos creaciones. "Poetavisión" cuntó amás con cartelería y, en xeneral, l’alumnáu deprendió a tocar la sintonía d’Eurovisión con flautes y panderetes, p’abrir l’empiezu del festival.

La gala foi emitida’l pasáu 23 d’avientu, cuntó hasta con anuncios y, a la fin, el veredictu del xuráu fue claro. Ganó Galicia, "que fixo una completa actuación", y los sos intérpretes ganaron unos auriculares y bolses de llambionaes. Segundos fueron los representantes de Méxicu y los terceros clasificaos fueron los cantantes d’España, "qu’algamaron una fonda conexón col público, qu’entamó a cantar y baillar en metá de la actuación". Los escolinos que cantaren por Rusia tamién animaron a los collacios y compañeros de clas col so arte.

Con estes, el Poeta Antón de Marirreguera dio-y una vuelta al Festival d’Eurovisión, amplió les sos fronteres y permitió la participación d’otros territorios y cultures.