L’Antroxu ye tamién cosa de rapacinos.Y n’Avilés y Xixón, les families curien esta fiesta pa que los disfraces y mázcares de lo más piquiñino de casa allumen estos díes de folganza, nos que nun hai que madrugar pa dir al colexu. Los neños y neñes nun tienen vergoña, o, meyor dicho, nun la gasten porque lo mesmo da-yos por dir de raposu pela mañana a mercar el pan que participar nuna discoteca móvil pela tarde. La reciella ye’l motor del Antroxu, esi ruxerrux básicu pa que la tradición furrule y pueda espardese de xeneración en xeneración.
Les asociaciones de families de los colexos entamen cada añu desfiles de mazcaritos n’Avilés y en Xixón. Na tercer ciudá asturiana, como l’Antroxu ye más llargu, de más díes, la reciella sal de vienres, pa cellebrar asina’l principiu d’estes vacaciones d’iviernu qu’en llugares onde nun hai tradición antroxera nomen "Selmana blanca". La tarde del vienres n’Avilés ye de los rapacinos, y como esti añu la temática del Antroxu ye los años 90, pues desfilaron con traxes venceyaos a esa década. Salieron los "Pikachu", los "Tois", los "Tamagotchis" y tamién hebo tiempu pa recordar les "Game boy" y el "Tetris", amás de los Xuegos Olímpicos de Barcelona-92, ente otros. Cada grupu representa a una escuela o colexu, y toos xuntos baillen al ritmu de charangues y fanfarries.
En Xixón ye daqué asemeyao, pero de domingu. Eso sí, nun hai temática denguna. Cada grupu sal de lo que-y apetez. Asina, el "Circo Antroxini" amuesó un cañón del que simulaben el llanzamientu d’un rapacín, coneyos que salíen de chisteres, domadores y hasta un maestru de ceremonies. Astronautes, marcianos, guerreros astures y otros personaxes, dalgunos concienciaos col cambeu climáticu, tomaron la ciudá del Piles.
Y ente toos y toes, los d’Avilés y los de Xixón diéron-yos color a les sos ciudaes con una fiesta que tien cantera, qu’emerxe como la espuma del Descensu avilesín de la calle Galiana cada iviernu nes aules de los centros educativos de la rexón y en díes como los citaos, pela cai y con allegría.
