La cooperativa del güertu Nazaret

Los estudiantes d’Infantil y Primaria del colexu uvieín participen nun proyectu d’anovación col qu’aprienden a cultivar y a calcular costos de producción

Ún de los caxones, asitiáu nel patiu del colexu Nazaret.

Ún de los caxones, asitiáu nel patiu del colexu Nazaret. / Diego Fernández

E. Peláez / S. C.

El güertu del colexu Nazaret d'Uviéu espárdese y da pa crear una cooperativa agrícola escolar. L’aniciu del proyectu escolar que da agora los sos primeros pasos ta na plantación qu'entamaron los alumnos y profesores "dende cero" nel cursu pasáu. Los cuatro caxones asitiaos nel patiu daquella dobláronse y dende va unos díes yá son ocho.

El proyectu d'anovación educativa qu’entamó col güertu ecolóxicu entró nuna nueva fase y "va crecer", aseguró’l coordinador de la iniciativa y xefe d'estudios d'Infantil y Primaria del centru, Vicente Vázquez Acebal. El programa, que cunta con subvención de la Conseyería d'Educación, "encaxa en toles árees curriculares".

"La bona acoyida del cursu pasáu llevónos a empezar esti nuevu proyectu", señaló’l docente, al pie de los caxones, acompañáu por dellos de los alumnos. Nel güertu qu'ocupó parte del patiu del colexu yá se collecharon va unos meses "arbeyos, berces, coles, pataques, cebolles, freses, pepinos y tomates". Pero tamién "fabes de la granxa y maíz apurríos polos güelos de los alumnos", dixo. Y ye qu'esti proyectu d'anovación tamién cunta coles families, que participen activamente.

Pela izquierda, Daniel Pérez, Lucas Pérez, Milena Pimentel, Paola Peña, Tomás Martínez y Lucía Luna, nuna de les faces destinaes al cultivu. Al llau, Vicente Vázquez constrúi una estructura pal compostaxe con materiales reciclaos.  | Diego Fernández

Pela izquierda, Daniel Pérez, Lucas Pérez, Milena Pimentel, Paola Peña, Tomás Martínez y Lucía Luna, nuna de les faces destinaes al cultivu. / Diego Fernández

Amás d'aprender les nociones teóriques de la sema y llevala a la práctica, nesti cursu l'alumnáu tamién va conocer cómo funciona una cooperativa agrícola. Los estudiantes, esplicó Vázquez, "van calcular los costos de producción, el valor de cada artículu y los beneficios". L'oxetivu ye entamar un mercadín solidariu y "habrá que decidir qué se fai col dineru que se recaude cola venta de los productos", recalcó.

Nel programa participen los 317 alumnos d'Infantil y Primaria del colexu uvieín. "Yá s'empezaron a impartir les primeres sesiones formatives", afirmó’l coordinador del proyectu, que vien cola collaboración del Copae (Conseyu de la Producción Agraria Ecolóxica del Principáu), Eki-Eco y Sembrares. El centru ta integráu na rede de güertos escolares, que'l so oxetivu ye sopelexar la conocencia de l'agricultura ecolóxica nos centros educativos.

Nesti cursu, comentó Vicente Vázquez, "vamos construyir una estación meteorolóxica con material recicláu y vamos trabayar el compostaxe". Utilizando tamién artículos usaos, empezaron a ellaborar unes composteres, unes estructures onde se van almacenar les borrafes orgániques pa tresformales en compost. Y "vamos dixilatizar el güertu", fixo’l docente. Hasta agora mangábense carteles col nome del productu que se cultivaba en castellán, inglés y asturianu y la fecha de sema. Pero va dase un pasu más y va mangase un códigu QR que dea accesu a un vídeu nel que va ser un estudiante’l que va falar del cultivu.

La cooperativa del güertu Nazaret

Vicente Vázquez constrúi una estructura pal compostaxe con materiales reciclaos. / Diego Fernández

"Nun buscamos la perfección, buscamos la esperimentación", manifestó Vázquez énte dellos de los estudiantes. Nel güertu, aseguró Paola Peña, de sestu cursu, "pasámoslo perbién". "Deprendemos muncho", dixo l'alumna. El so compañeru Lucas Pérez manifestó "les sos ganes de trabayar" nos caxones, como nel cursu pasáu. Tamién-yos ilusiona conocer el funcionamientu d'una cooperativa agrícola.

El proyectu del colexu Nazaret cunta esti cursu con una subvención de 8.000 euros per parte de la Conseyería d'Educación. Una cuantía que creció al respeutive de la recibida un añu primero pa que'l colexu entamara’l güertu ecolóxicu, que yera de casi 5.000 euros.