N’Ablaña éntrase al cole de lo más "Happy"

Los alumnos del centru d’Ablaña-La Perea caltienen el retu que’l "Princesa" de los Deportes, Eliud Kipchoge, marcó y dediquen unos minutos a baillar xunto a profesores y families primero d’aportar a clas

Los alumnos y profesores amuesen una de les coreografíes del baille primero d’entrar al centru.

Los alumnos y profesores amuesen una de les coreografíes del baille primero d’entrar al centru. / Andrés Velasco

Andrés Velasco / S. C.

Suena’l cantar "Happy", de Pharrel Williams, y la ventena d’alumnos del colexu d’Ablaña-La Perea tomen posiciones. Tamién dellos padres y los profesores. Y entama la coreografía. Brazos arriba, pasos a un llau, media vuelta... Y cuando termina la música, aplausu y a clas. Y ye que nesti cole decidieron caltener el retu que l’atleta Eliud Kipchoge, premiu "Princesa d'Asturies" de los Deportes en 2023, marcó p’afalar l’actividá física diaria ente los más pequeños.

La direutora del colexu, Natalia Suárez, esplica que la forma de trabayu del colexu dende va años ye la de facelo por proyeutos. Y esti añu, por ser olímpicu, tocaron los deportes y l’actividá física. "Surdió too colos premios ‘Princesa’, porque una de les actividaes qu’ufiertaben tenía que ver con esto", señala la docente. Amiesta que "lo que nos proponíen yera facer un rexistru de l’actividá física y facer 15 minutos d'actividá física extra". Viendo’l perfil del so alumnáu, que la direutora ve "vulnerable", decidieron que diba ser mesmo nel colexu onde diben promover esi exerciciu. Al nun poder facelo n’horariu lectivu, "porque la llei marca bien nidio les hores de cada asignatura, decidimos que podía facese nos 15 minutos de tresporte que tenemos atención al alumnáu, y encáxanos llegalmente".

Tomaron la decisión de qu’esi cuartu d’hora diba dedicase a facer una coreografía. Y la midida tuvo tan bona acoyida que decidieron caltenelo más allá de les trés selmanes que proponía Eliud Kipchoge. "La verdá ye qu’empezamos la xornada entrando en calor y con un chute de dopamina natural", indica Suárez, que tamién rescampla que la iniciativa tuvo ésitu enforma ente los padres. "Tenemos un alumnáu onde había un enclín a la poca participación por parte de les families, pero esta actividá fixo que sí que se vea esa implicación de los padres, y eso ye un gran llogru", fae la docente.

El baille de «Qué ganes tenía de vete», xusto enantes d’entrar, con dellos alumnos y los sos padres al fondu. | A. V.

El baille de «Qué ganes tenía de vete», xusto enantes d’entrar, con dellos alumnos y los sos padres al fondu. / A. V.

¿Pero cómo lo preparen too? Una de les profesores del centru, Yolanda Valdés, ye la que s’encarga de diseñar les distintes coreografíes. Y cuando los alumnos aporten al colexu, ponse la música y toos siguen el baille. "La verdá ye que ye bien prestoso", señala la direutora. Cada selmana o selmana y media, cambien de cantar: "Cuando vemos que‘l baille ta domináu, camudamos la coreografía", apunta Suárez.

Dende’l centru tovía nun se punxeron en contactu con Eliud Kipchoge pa face-y llegar que la so propuesta ta calteniédose nel centru, anque nun lo refuguen. "Ye una posibilidá intentar contautar con él al traviés de les redes sociales pa que pueda ver que nel nuesu colexu la so idea biltó con fuerza", señala la direutora.

Eso sí, na receición que fixo na Fábrica d’Armes de la Vega diéron-y en persona un trabayu que relizaron nel centru sobre él. "Al cabu, la recompensa ye pa los neños, que ven cómo un atleta recibe esi proyeutu que fixeron con tantu mimu", esplicaba la docente.

Coles mesmes, esta última selmana, los alumnos tán entrando a clas al ritmu del cantar "Que ganes tenía de vete", del grupu "Aslándticos". La coreografía tiénenla más o menos dominada, asina que llueu van pegar un blincu a una nueva. Un retu que los fai aportar al colexu cada vegada con más motivación.