Güevos Pintos y traxes asturianos: los neños del Peña Careses caltienen les costumes

Más d’un mes lleven los 216 alumnos d’ente trés y cinco años del colexu Peña Careses de La Pola Siero preparando a conciencia’l so mercadín especial de Güevos Pintos Solidarios, que se va celebrar los próximos 19, 20 y 21 de marzu. Los escolinos van distribuyir el so mercadín por tramos d’edá, entamando nel primer turnu los neños de terceru d’Infantil. Una tradición qu’empezó yá va más de quince años, según sostién la direutora del centru, Lucía Canga. Lo especial d’esti singular rastru, dirixíu a les families de los escolares, nun ye namás que seyan los menores mesmos los que pinten los elementos decorativos, sinón que, amás, fáenlo con fines solidarios.

Esti añu, tola recaudación atropada a partir de les ventes de los alumnos, na que cada familia apurre la voluntá, va destinase a la Fundación Fast España, creada pa sofitar la investigación del síndrome d’Angelman, una malura xenética que causa un retrasu nel desarrollu, problemes cola fala y l’equilibriu, discapacidá intelectual y, dacuando, convulsiones.

Canga señala que "cada añu collaboramos con una asociación distinta, pero siempre que sía daqué cercano y, sobremanera, que tenga que ver con neños". Si ente l’alumnáu hai dalguién que careza dalgún trestornu o tea en dalguna asociación, "siempre intentamos collaborar con esa de primeres". Asina, na llista de delles de les fundaciones coles que trabayaron alcuéntrense tamién l’Asociación Nora, l’Asociación de Diabéticos del Principáu d’Asturies (Asdipas) o Galbán, de families de neños con cáncer. "D’esti xeitu, collaboramos, amás, colos proyeutos de terapies ya investigación que tean entamaos, daqué que consideramos fundamental". Per un llau, "les families collaboren por una bona causa y, per otru, lleven pa en casa un recuerdu fechu coles pequeñes manines de los sos fíos", rescampla Canga.

Otra de les coses que destaca la direutora del centru ye’l fechu de que "empezamos a cencielles cola decoración de los ‘güevos’ y, añu a añu, fuimos axuntando más coses". Amás, los rapacinos, xuntos coles sos profesores, faen tamién una cestina pequeña pa metelos dientro. "Cada maestra escueye’l material col que lo quieren facer. Asina, hai cestes feches con cartulina, fieltru o goma eva, ente otros materiales".

Per otru llau, el colexu foi incorporando a la celebración del mercadín los traxes asturianos y los bailles y folclore típicos d’Asturies. "De primeres, teníemos ochenta traxes, que los fabricare’l profesoráu mesmu con fieltru y material recicláu, y agora yá fuimos quien a vistir a tol alumnáu". Amás, esti añu aumentaron los cantares, interpretaos ente les dos y les cinco la tarde. "Los neños d’últimu añu van cantar ‘El xiringüelu’ y ‘Los Cachetíos’, ente otros cantares asturianos, amás de baillar la danza prima".

Como colofón de l’actuación "van interpretar l’Himnu d’Asturies, que nun puede faltar nengún añu". D’esti xeitu, "somos quien a caltener les tradiciones non solo del colexu, sinón tamién les d’una folixa tan importante pa los polesos como ye la de los Güevos Pintos. A esto axúntase tamién la del traxe asturianu, qu’agora yá nun se ve tanto nes festividaes como va dellos años, mesmo que los instrumentos y el folclore asturianu en xeneral", remata Lucía Canga.