El Matemáticu Pedrayes de Llastres da la batalla contra la contaminación

La educación nun ye namás atropar conocencies calcando los coldos sentáu nun pupitre, y en Llastres, nel conceyu de Colunga, sábenlo perbién. Nel colexu Matemáticu Pedrayes entienden la importancia d’enseñar a los sos quince alumnos valores con actividaes que trescienden les aules, conectándolos cola so redolada, ayudándolos a entender el mundu y formándolos como ciudadanos comprometíos. Asina lo demuestren col so últimu proyeutu, que ye anovador, interdisciplinar y comuñal.

Y ye que, nesti cursu, el colexu llastrín apostó por integrar los Oxetivos de Desarrollu Sostenible (ODS) en delles de les sos actividaes escolares y, pa ello, ayudóse de "Nova", un robot humanoide del futuru qu’encargó a los neños una misión bien especial: ayudar a construyir un mundu meyor: "Va proponiéndo-yos delles xeres cada selmana. Entamaron nel primer trimestre trabayando sobre la probeza y la fame, y agora toca’l cambiu climáticu", esplica la direutora del centru, Desirée Martínez.

La última xera que-yos dexó "Nova" centróse nes famoses "3 R" (Reducir, Reutilizar y Reciclar), una propuesta que va llevar a los rapazos a diseñar folletos de sensibilización que van repartir pela localidá colunguesa, amás d’ellaborar un mural a comuña p’amosar a los sos vecinos que toos pueden contribuyir a facer un planeta más sostenible: "La idea ye tresmiti-yos qu’inclusive les pequeñes aiciones son importantes", detalla la maestra.

Sicasí, la misión selmanal nun quedó ende. Los alumnos viéronse envueltos nuna iniciativa más interesante y orixinal, convirtiéndose n’axentes d’una auténtica patrulla contra la contaminación. Una actividá que forma parte d’un proyeutu más ambiciosu en collaboración cola Universidá de Deusto, en Bilbao: "AmIAire: Rede ciudadana pa la monitorización de la calidá del aire".

Con creatividá y compromisu, los neños aprendieron a fabricar a mano los sos propios sensores de midida de la contaminación de Llastres. El cenciellu procesu consistió en pegar una fueya de papel blancu nun soporte de cartón y aplicar sobre ella una capa de vaselina na que van quedar apegaes les partícules del aire en suspensión.

Estremaos en grupos pequeños y acompañaos polos sos profesores, los estudiantes salieron a la cai p’asitiar estos sensores en puntos estratéxicos del pueblu. Dalgunos empobinaron p’hacia’l barriu más altu de Llastres y otros optaron pela zona del puertu; unos mangáronlos al pie de semáforos de cais pindies y otros al pie de contenedores de basura o negocios locales. Inclusive tuvieron collaboración de los vecinos y de los pescadores de la Cofradería de "Santa María de Sábada".

La próxima selmana, después de siete díes d’esposición, los pequeños científicos van retirar los dispositivos p’analizar col microscopiu les partícules recoyíes. Sedrá l’alumnáu de Secundaria d’otros centros l’encargáu de reconocer los niveles de contaminación a partir d’imaxes tomaes colos sensores y un software desarrolláu pola Facultá d’Inxeniería de la Universidá de Deusto. Ellí van cruciase los datos arrexuntaos por tolos colexos que participen nel proyeutu. En total son más de trés mil los estudiantes repartíos pela xeografía estatal los que formen parte d’esta iniciativa.

Estes actividaes non solo espertaron el maxín de los alumnos, sinón tamién la so conciencia mediuambiental. Ye’l casu d’Izan Alonso, Marcos González, Eneko Fernández y Samuel Rodríguez, quienes disfrutaron de la salida al campu ensin perder de vista l’oxetivu principal: "Gústame esta actividá porque salimos de clas y alendamos, y p’alendar bon aire hai que contaminar menos", dixo Izan. "Toos podemos contribuyir pa llograr un mundu meyor. Nós en casa, por exemplu, donamos; yo doné los mios xuguetes", comentó Samuel.

Nel Matemáticu Pedrayes de Llastres demuestren que, pasín ente pasu, con intención y ganes, ye posible liderar el cambiu escontra un futuru más sostenible.

"Cola ayuda del Gobiernu del Principáu d'Asturies"