El colexu San Pedro de los Arcos tien a Asturies nes sos aules

Cada mañana, cuando los alumnos de 4 años del colexu uvieín San Pedro de los Arcos entren al aula, aporten a Nava y ven a la mascota de so clas, la mazana. Mui cerca, l’espaciu nel qu’estudien los escolares que tienen un añu más convirtióse en Cabrales, y el quesu apodera la decoración de la puerta. Cada aula ye un conceyu asturianu, y delles actividaes entamaes xiren alredor del conocimientu d’esi conceyu.

El proyeutu llámase "Somos Asturies", enxareta a tolos cursos dende’l primeru d’Infantil hasta l’últimu de Primaria, y, sorraya’l direutor del centru, Ramsés García, "vieno pa quedase". "Ye un proyeutu ambiciosu, que ye mui potente", fae’l docente sobre la iniciativa, que nun va quedar pa esti cursu escolar namás.

Una maqueta de grandes dimensiones de la fachada del conceyu d’Uviéu, ellaborada pol artista Gregorio Álvarez Iguacel, "Goyo", preside l’estragal del equipamientu educativu. Ye’l kilómetru 0 y el puntu de partida del percorríu nel que, sostién García, "convertimos el colexu nuna Asturies xigante".

Esti proyeutu tien como oxetivu que los 170 alumnos del colexu, qu’axunta a venti nacionalidaes, "conozan la comunidá y se venceyen emocionalmente con ella", destaca la xefa d’estudios, Sandra Carranza. Les distintes actividaes permíten-yos atopar requexos desconocíos pa ellos, pero nun lo faen nes aules namás, sinón que tamién lo faen con viaxes.

En 4.u de Primaria, la so mascota ye Acuarius ya inclúi’l "Elogio del horizonte" y una foca. "Ta fecha con plastilina banca y alkyl", espliquen los escolares sobre la figura, que s’enseña nuna mesa del aula. Tocó-yos ser Xixón, y los estudiantes cunten les selmanes que-yos falten pa realizar un viaxe al conceyu.

Pelos pasiellos, ente clas y clas, pueden contemplase la ponte "romana" de Cangues d’Onís, un mapa de grandes dimensiones col territoriu d’Asturies y hasta una marquesina d’autobús. Dientro del proyeutu, rescampla’l direutor del centru, "les estremaes árees tienen un bancu d’actividaes venceyáu a la temática". Trabáyase d’un xeitu tresversal.

Los escolares conocen "les carauterístiques de los conceyos, les sos fiestes y la so gastronomía", afirma Sandra Carranza. Amás, nes distintes celebraciones como l’Antroxu o l’amagüestu ta presente’l proyeutu "Somos Asturies". Y la idea ye que tea presente tamién n’actividaes rellacionaes cola programación y los videoxuegos. Llega inclusive al comedor, onde cuenten mangar nes parés imaxes d’Asturies.

De Castropol a Ribadeva toma’l percorríu pel mapa de la comunidá que se diseñó nel colexu San Pedro de los Arcos y nel que los alumnos pudieron conocer qu’en L.luarca se puede visitar una amuesa de calamares xigantes o que Castropol ye conocíu poles sos ostres.