L’Avilés, escuela de valores nel deporte

Respetu, trabayu n’equipu, disciplina… Esos son dellos de los valores que los xugadores del Avilés traten d’esparder pelos munchos colexos de la ciudá. Y ye que, práuticamente una vegada a la selmana, dalgún de los xugadores de la primer plantía blanquiazul escapa de la dinámica habitual d’entrenamientos p’atender a los más mozos. Yá sía con ruedes de prensa improvisaes o con charles, los futbolistes comparten colos neños dalgunos de los sos trucos pa meyorar dientro y fuera del terrén de xuegu.

“Nel deporte hai dellos valores, como la puntualidá y el respetu, que son perimportantes. Dacuando tamos, a última hora, revisando que lo llevamos too. Ye mui importante llegar a la hora, porque otra cosa ye una falta de respetu tanto a los compañeros como al entrenador", recordó Viti a los neños del Palaciu Valdés nuna de les últimes visites realizaes. El defensor lleonés tamién s’alcordó de los árbitros, pa los que pidió respetu, por que "son humanos". "Munches vegaes son los más damnificados, y eso nun puede ser. Hai vegaes que pueden equivocase, pero hai que respetar a tol mundu", dixo’l futbolista.

Pali, xugadora del primer equipu femenín, faló colos neños de la importancia del trabayu n’equipu, daqué clave nel mundu del fútbol. "Hai actividaes que se faen fuera del campu, como rutes o cenes, qu’ayuden enforma a ello. Nesti deporte ye perimportante comunicate y facer piñu colos tos compañeros. Hai que tener enfotu dientro del campu, porque si a ellos-yos va bien, a ti tamién", comentó la centrocampista, que tamién trató’l tema de la resiliencia "pa ser emocionalmente más fuerte". "El deporte tenemos que lu tomar como daqué que nos preste, que ye lo más importante. Asina van dir formándose unos valores que, cuando lleguéis a mayores, van venivos bien. Competir yá lo fadréis de mayores", fexo l’avilesina, que, cuando-y tocó la vez pa falar recordó lo que pasó nes categoríes inferiores del Xixón Femenín, cuando unos padres faltaron a les neñes. "A mi ye una cosa que tamién me pasó, a los padres píca-yos la mosca enforma qu’unes neñes ganen a los rapazos. Quédanos muncho por crecer", afirma.

"Lo más importante, mesmo na vida que nel deporte, ye tener unos principios y unos valores. Ún d’ellos el respetu, tanto a los compañeros, como al árbitru y al entrenador", fizo Natalio, capitán del Avilés, nuna visita al Marcelo Gago, otru de los colexos de la ciudá. El valencianu tamién faló del trabayu n’equipu, una de les claves pa qu’un equipu de fútbol consiga los sos oxetivos. "Esti añu, nós tenemos un gran vestuariu, y eso nótase", confesó. "Otru valor añedíu ye la disciplina, dir entrenar tolos díes, comer de manera saludable... Los deportistes tenemos que llevar una vida de toes toes", esplicó’l delanteru avilesín, que destacó la suerte que tienen dambos "de facer lo que nos presta y apasiona”. Álvaro Fernández, porteru, destacó la importancia de pasalo bien faciendo deporte y "la capacidá que tien pa facer amigos".