El cole multimedia tiénenlu en Mieres

Col entamu, a poco y a poco, de les nueves tecnoloxíes, la comunicación y los medios convirtiéronse en ferramientes fundamentales pa la vida. Y pa que los neños salgan preparaos pa esi baturizu de mundu que los espera, nel colexu Aniceto Sela de Mieres punxeron en marcha dellos proyectos p’avera-yos los medios más tradicionales, como la radio y la televisión. Asina nacía va dos años Radio Ceto, a la qu’esti mesmu cursu s’axuntaba Tele Ceto. El colexu tamién tien una revista añal. "L’oxetivu ye que los neños conozan la comunicación, y tamos teniendo bonos resultaos, porque présta-yos pola vida", apunta Maite Duarte, la direutora del centru educativu.

El nome d’entrambos medios vien pola mascota del centru, "Ceto". "Ye dalgo mui nuestro", afirma la direutora, qu’esplica que "llevamos dos años con Radio Ceto". "Mercamos el kit de radio, fiximos un cursu de la Conseyería y entamemos esti proyeutu", indica Duarte, p’amestar que, magar empezaron con un "estudiu" namás, agora yá tienen dos. "El primer cursu que lo fiximos entamamos colos neños de 5.u y 6.u de Primaria, pero esti añu yá vamos llevando a tolos cursos, inclusive a Infantil", afirma la docente. "La idea ye que tol cole acabe por facer radio", esplica.

Maite Duarte diz que los rapazos faen, fundamentalmente, entrevistes. "Cuando daquién vien a dalguna xornada o a la selmana cultural, aprovechamos pa face-y una entrevista pa la radio, que dempués se manga nuna plataforma d’interné y na web del centru pa que pueda escuchase", esplica la docente, qu’enseña’l so arguyu por que’l primer invitáu de Radio Ceto fuera l’artista Víctor Manuel.

Tamién se faen programes sobre lo que los escolinos estudien nes sos asignatures. "La idea ye que toles asignatures puedan arreyase al proyeutu", apunta.

Tocantes a Tele Ceto, el proyeutu ta muncho más nel entamu, y apenes lleven un mes n’emisión. "Faltábanos pintar el croma y, agora que lu tenemos, yá nos punximos a ello en cuenta d’esperar al cursu siguiente", afirma la direutora. Tamién s’empezó colos escolinos del últimu ciclu de Primaria, pero va estendese al restu de la comunidá educativa del centru.

Los escolinos tán encantaos cola iniciativa. "Présta-yos, porque amás son dos medios interdisciplinares que pueden trabayase en toles asignatures y con tolos profesores", señala Duarte, que ve perpositiva la meyora de los sos estudiantes en dellos campos. "Vemos que la espresión oral, la comprensión, la llectura o la escritura meyoren enforma, porque son ellos los que preparen los programes o les entrevistes", afirma. Inclusive los mayores encárguense yá de montar los audios.

Esta primer toma de contautu ye ilusionante pa los neños. Como Mael, que pon los cascos con remangu y garra’l micrófonu pa tar charrando un ratu colos compañeros. "Gústame enforma la radio", diz tímidamente. Al so llombu, otros compañeros graben una suerte d’informativu nel croma. Véselos sueltos. Quiciabes el futuru Pedro Piqueras o Isabel Jiménez salgan del Aniceto Sela. El trabayu yá lu tán faciendo.