Un baille con muncha tradición

Nel pasiellu del uvieín colexu San Pedro de los Arcos delles figures baillen col traxe asturianu. Les muyeres lleven falda colorada y dengue negru, y los homes, montera picona y faxa prieta. Madreñes y castañueles son otros componentes carauterísticos que porten les figures pintaes na paré, que baillen, xuníes, el xiringüelu.

Pero a esa vestimienta típica axuntáronse-yos elementos del vistir de los países d’orixe de les families que componen la comunidá educativa. Les figures porten una especie de tocáu o diadema que s’utiliza en Rusia, pulseres que representen a Ecuador o sombreros típicos de Marruecos. Tamién s’incorporaron los colores de la bandera de Venezuela na zona baxa d’una de les faldes.

Esti foi un trabayu en comuña entamáu por madres d’escolinos y les artistes Mónica Solar y Soraya Sainz. El mural, qu’ocupa nueve metros y se punxo na primer planta, representa a figures en movimientu, ensin cares. "Simboliza la fiesta y la unión", afirma’l direutor del colexu San Pedro de los Arcos, Ramsés García, sobre una iniciativa que nagua por que "les families se sientan partícipes".

"Queremos que siga creciendo", indica sobre l’actividá, que s’enxareta nel proyeutu que desarrolla’l centru a lo llargo de tol cursu y que creó una Asturies dientro del colexu, con cada clas dedicada a ún de los conceyos. L’AMPA (Asociación de Madres y Padres d’Alumnos) del colexu San Pedro de los Arcos "quería entamar esta iniciativa conxunta". "Tardamos una selmana y media porque nun podíemos quedar más que dacuando a ratos", esplica Mónica Solar.

La temática "coneutóse col proyeutu nel que tán somorguiaos los alumnos, centráu n’Asturies". "Pensamos que toles cultures tienen el so traxe tradicional y a partir d’ehí desarrollóse la idea", apunta l’artista. Solar recalca que "esti ye ún de los murales más guapos que fiximos", yá que pretende "averar la cultura asturiana, pero con elementos d’otros países nel traxe tradicional".

La obra ta allugada nún de los pasiellos del primer pisu. "Los alumnos tán encantaos col mural", diz el direutor del centru, qu’afirma que’l proyeutu "va siguir creciendo". Mónica Solar y Soraya Sainz participaron yá l’añu anterior na creación d’otros dos murales nel colexu San Pedro de los Arcos. Nesi casu taben allugaos nos dos accesos del centru al equipamientu educativu, nun muriu y nuna puerta.

Les dos artistes fexeron el diseñu y entamáronlu cola ayuda de dellos alumnos y de los sos dibuxos que s’escoyeron nel concursu de cartelos del Día de la Muyer na Ciencia y nuna representación teatral. Esta actividá enxaretábase nos actos del Día de la Muyer.