Villalegre y el so viaxe interestelar

Los escolinos de Villalegre viaxen en cohete ensin movese del aula. Deprenden y estudien les estrelles, saben yá dende Infantil lo que son les galaxes, los planetes y qu'esti mundu y toos los conocíos surdieron tres un gran españíu, el Big Bang. Desplíquenlo too los neños y neñes d’Infantil d’esti colexu avilesín que-y dio pol desenrollar un proyectu de cursu basáu nel espaciu. Ye más, dellos yá quieren ser astronautes y tienen un camín abondo andáu porque de constelaciones saben llatín. Gabriel Tello y Lola Arenas falen de qu’hai ocho planetes, y cunten coses de Mercuriu, de Venus, de Xúpiter,....

Demientres Faruk Houssaini diz qu’el so planeta preferíu ye Saturnu polos sos aniellos y tamién ta perhí Elías Jiménez que lleva un cohete nes sos manes y too nel pasiellu d’Infantil, onde too ye espacial. Dibuxos, pintures de polvo d’estrelles y con una idea bien clara: "La Tierra ye’l nuestru planeta", comenten enantes de facer una cuenta atrás, como si despegara un cohete.

Esi cohete torna d’edificiu y aporta al de Primaria. Allí tamién falen del Sol y la Lluna, de la Estrella polar "que ye de les que más allumen", diz Alba Ceñal, que fala con Ángel Gabriel Jiménez y otros rapacinos sobre l’espaciu, una xera qu’entamaren a primeres del cursu y qu’entá siguen con ella y too porque ye un proyectu de centru y tien que ver col eclipse solar que va podese ver dende Asturies el prósimu 12 d’agostu.

"Facemos trabayos de llectoescritura, cuentos con códigos QR inventaos polos mayores y dibuxaos polos más pequeños", desplica la directora del colexu de Villalegre, Sonia Castillo Rogel, que fala de dellos alumnos que tan a piques de presentar un trabayu d’investigación a cuenta de la contaminación llumínica. Carla Ontiveros, Hugo Velasco y Álex Rábano son de 5ºB y falen, ente otres coses, que la contaminación de la lluz ye capaz de "tapecer la vista del eclipse".

Otros como Dani Díaz dulden de si hai vida estraterrestre pero lo que tien claro ye que la Tierra ta nel sistema solar y na Vía Láctea. Otres como Selvi Neira falen de qu'un telescopiu ye un bon amigu pa ver les estrelles, otros falen de nebuloses que son "estrelles qu’españen y xeneren un polvo guapísimu".

Los escolinos d’esti centru avilesín falen d’estrelles fugaces, d’eses que salen y malapenes pueden vese, y que de cuando en vez da-yos por pidir deseos qu'hai delles vegaes que nun se cumplen. A otros inquieta-yos enforma’l llabor de los satélites "que graben".

Y a Manuela Mate y a Clara Hurtado dio-yos por estudiar los eclipses anulares "que ye cuando la lluna pasa entre la Tierra y el Sol y dexa un aniellu" qu’alluma más de lo normal.

Mentantu, analicen l’espaciu y deprenden el llabor de muyeres que tamién son astrónomes como ye’l casu de l’alemana Carolina Herschel o la bióloga molecular y aspirante a astronauta leonesa Sara García Alonso, recuerda la alumna Inés Méndez. Annie Cannon, indiquen estos rapacinos, foi una astrónoma estadounidense que fexo una fondera clasificación de les estrelles.

Mentanto otros falen de la "Gran estrella colorada", de los furacos prietos y círculos invisibles y oses polares, la mayor y la menor y otres cuestiones que-yos permiten viaxar a otros planetes, a otres galaxes. Pinten y estudien y deprenden sobre un mundu qu’abre’l maxín de pequeños y grandes nun colexu de barriu como’l de Villalegre. Unos camienten en ser astrónomos y otros piensen en ser astronautes y hailos que-yos val solo con pegar el güeyu a un telescopiu y suañar coles estrelles, pidir deseos y xugar porque viaxar a otros planetes ye una bona manera de deprender xugando, bien seya Marte, Neptunu o’l mesmu cinturón d’Orión.