24 de noviembre de 2009
24.11.2009

Gregorio Mayoral, executor de la xusticia

El verdugu español más famosu llega a Uviéu camín de Tinéu p'axusticiar col garrote vil a Rafael Gancedo, que dos años antes matara a la muyer y un fíu

24.11.2009 | 01:00
«Garrote vil», cuadru de Ramón Casas.

El domingo 18 de xuno de 1899, de pie nel estribu del tren mixtu, Gregorio Mayoral esperó a que llevantara'l fumu que la máquina de vapor espardiera pela estación del Norte d'Uviéu. Cuando escampló, vio cerca de la puerta dos persones vistíes cola discreta distinción que da ser funcionariu, nin ricu nin probe: l'inspector de servicios municipales y el porteru de la Fiscalía. Un poco más atrás tamién había una pareya de la guardia civil. Taben esperando por él, y anque miraben pa tolos viaxeros que llegaben, namás echa-y la vista a él supieron que yera la persona que teníen que recoyer. Siempre, en toles ciudaes a les que llegaba, pasaba lo mesmo. Nun-yos costaba muncho reconocelu, seguramente pol maletín negru del que nun se separaba nunca.


Pa Mayoral, trenta y seis años, seis exerciendo como verdugu de l'Audiencia de Burgos, esi yera'l momentu más importante del viaxe. Yera cuando s'enteraba de si la persona a la que tenía que dar garrote yera home o muyer. Del so oficiu eso yera lo único que lo esmolecía. El trabayu empezaba cuando recibía un escarnáu telegrama nel que se-y comunicaba: execución prevista en tal provincia pa tal día. Con eso, y el so maletín negru, poníase en marcha. Pero hasta que nun llegaba a la ciudá nun solía enteráse del nome del reu, y polo tanto del so sexu. Tarrecía executar muyeres. Seguramente por vezu patriarcal, por simple machismu, pero tamién porque la primer vez que tuvo que dar garrote él solu, ensin l'axuda d'un verdugu veteranu, como Lorenzo Huertas, el so maestru nel oficiu, tocó-y una muyer. Resultó un desastre. Daquella Gregorio Mayoral nun perfeccionara'l so garrote vil, y l'espectáculu foi llamentable.


Na estación d'Uviéu, cuando otros viaxeros se dieron cuenta de la consideración cola que los funcionarios trataben a aquel paisanu pequeñu, un poco cutruyu, de barba zarrada y negra, y gorra castellana, quixeron saber quién yera. Como fiel siguidor d'esi dichu popular de que lo que quita'l fríu quita la calor, vistía zamarra parda y un pantalón de pana. Yera xuno y el día soleyeru. Aquel paisanu nun yera un delincuente, porque la guardia civil saludábalu con muncho requiloriu. Una autoridá tampoco, porque vistía más bien como un paisanu un día de feria. Cuando dalguién dixo que yera'l verdugu, la concurrencia calló y fexo alredor del grupu un círculu de curiosidá, superstición y auténticu miedu. Al echar a andar pela cai Uría p'alantre, en dirección a la Cárcel Galera, una considerable tropa diba acompáñandolos a una distancia prudencial.


Mayoral, aquella vez que tuvo qu'axusticiar a la so primer muyer, sentóla na banqueta y púnxo-y el collar metálicu nel pescuezu, mientres el cura s'afanaba en rezar el Credo. En llegando al «Deum de Deo, lumen de lumine...», como si eses palabres fueren una seña convenida que se tresmitía de verdugu a verdugu, Mayoral fixo xirar el rabil, pero igual porque yera inexpertu, igual porque taba matando a una muyer, o porque nun funcionaba bien l'ardiluxu, en vez de partir el gañote de la paisana y acabar pronto, la muyer fizo un esparabán violentu con tol cuerpu, rompió la correa que-y ataba les pates a la banqueta y llevantóles perriba la cabeza, pegando con un pie nel poste nel qu'apoyaba'l llombu. De la que subía arremangó-y tal patada al cura que lu tiró del cadalsu ensin dexalu terminar el credo. Los espectadores, circunspectos hasta entós como correspondía al momentu de ver morrer una persona, entamáronla col verdugu, col cura y cola muyer, y nun paraben de festexar la fazaña. Pa encima, al alzar tanto les pates, la saya de la muyer quedó arrebuyada na cabeza, dexando ver que nun llevaba bragues. Mayoral, como pudo, xiró con fuerza'l rabil y terminó con aquel llamentable espectáculu. Depués quitó la saya remangada de la cabeza la muyer y tapó-y les vergoñes, ente la risión del públicu.


Mientres exercía'l so oficiu, el verdugu de l'Audiencia de Burgos yera un paisanu de poques palabres, pero tampoco foscu nin malhumoráu. De nun ser porque'l so trabayu naide lu tomaba a broma, podía dicise que yera simpáticu. Taba avezáu a que la so presencia llevantara rocees ente tol mundu. Aquelles persones que meses enantes vitoreaben qu'a un reu lu condenaren a muerte, negaben pan y sal a quien tenía la función de cumplir la sentencia. Mayoral viaxaba con una bolsa onde llevaba dalguna muda y lo que precisara pal aséu personal, y un maletín de madera, enceráu y negru, siempre a mano. «La mio guitarra», dicía sorriendo, señalando pal estoyu escuru onde, envueltos en tela de raso, brillantes, engrasaos, llevaba los fierros colos qu'aplicaba'l garrote vil. Nos primeros meses d'oficiu buscaba posaes o pensiones onde quedar los díes que precisaba pa facer el llabor, pero en cuanto sabíen que yera'l verdugu o nun-y abríen la puerta o lu mandaben marchar si yá-y la abrieren. Platu y cuyar coles que comía, platu y cuyar que se tiraben. Si montaba nun burru, l'animal tamién taba condenáu a morrer.


El garrote vil pretendía humanizar la pena de muerte, pero basta con saber qu'esa humanización llegó de la mano de Fernando VII pa sospechar d'ella. En 1832, como regalu de cumpleaños a la muyer, la reina, aquel rei prohibió en tolos sos dominios la forca como manera d'aplicar la pena muerte, xeneralizando'l garrote. Y ye qu'España nun yera un país seriu nin p'axusticiar a los condenaos. Como la forca ye una manera de morrer lenta y terrible, los verdugos axudaben a pasar el tragu. Unos subíense a los costazos del colgáu pa, calcando, acabar primeru, mientres otros menos áxiles limitábense a agarralos de les pates y tirar d'ellos p'abaxo, evitando asina, tamién, qu'espatuxaren muncho. Col sobrepesu pasaba a veces que rompía la soga, y yera cosa conocida qu'ello ocurría más si'l verdugu yera vieyu que si yera nuevu, conque les autoridaes sospechaben que se dexaben sobornar polos parientes del condenáu y aviaben el cordel pa que rompiera. Los llexisladores discutíen si yera conforme a derechu volver a colgar a quien saliera vivu d'una execución. Frente a la consistencia duldosa de la cuerda, los fierros del garrote resultaben infalibles.


Como víen entrar y salir al verdugu de la cárcel, acompañáu de la guardia civil, había quien pensaba que se trataba d'un ritu, que les fuerces del orde metíen al executor en prisión como pa facelu purgar aquel crime llegal. Non tal. Gregorio Mayoral, cansáu de cares fosques y malos modos nes pensiones de la España que visitaba, terminara decidiendo comer, cenar y dormir na cárcel, onde nun-y costaba nada y naide lu molestaba. Entretenía les hores d'espera dando llargos paseos pela redolada d'Uviéu, solu, y si topaba con dalguién que nun lu reconocía, paraba a charlar un ratu. Cuando dio col madreñeru de Pandu, Sindo, interesóse pol llabor y miró mui atentamente cómo forgaba la madera l'asturianu, dándo-y inclusive conseyos de cómo ameyorar dalguna ferramienta del oficiu. Cuando Sindo supo que'l pasisanín yera'l verdugu, picó pa lleña toles madreñes que tocara Mayoral, y de nun ser pola muyer, igual quema'l taller.


El garrote vil nun yera nengún instrumentu qu'humanizara la muerte, si ye qu'esi pasu hai manera de que se dea de manera humanitaria. N'asturianu esiste la palabra garrote, qu'amás de nomar la tranca cola que se dan los garrotazos, ye'l palu del que se manda'l qu'ata'l manoyu de paya pa facer el noyu. La muerte por garrote, yá dende la Edá Media, yera eso: un poste al que'l reu arima'l llombu, una soga qu'aprieta'l gañote del que va morrer abrazando tamién el poste, y un garrote o palu que'l verdugu manexaba dende detrás, dando vueltes a la soga hasta qu'asfixiaba a la víctima. Nel sieglu XIX modernizárase, pasando a ser un instrumentu de fierro. Nun paga la pena entretenese en desplicar pasu ente pasu cómo funcionaba'l mecanismu d'estos modelos y de les variantes qu'hubo. Basta dicir que'l verdugu accionaba un rabil, moviendo un tornu de tal manera que'l corbatín qu'abrazaba'l pescuezu de la víctima se desplazaba hacia'l poste, aplastando'l gañote hasta dexalu reducíu a una anchura de dos deos. La víctima quedaba engorguzada, cola cara morada, l'horror del trance na expresión y la llingua fuera. La del garrote yera tamién una muerte lenta: si se daba bien yera cosa d'unos minutos llargos, pero yera habitual que'l condenáu tardara en morrer ente diez y venti. Hasta que Gregorio Mayoral, l'executor de la xusticia, perfeccionó l'instrumentu pola so cuenta.


El miércoles 21 de xuno de 1899, a les cuatro la mañana, Gregorio Mayoral abandonó la Cárcel Galera d'Uviéu, la cárcel de muyeres, y púnxose en camín, pela Silla'l Rei p'arriba, pa contra Tinéu. Diba acompañáu por una pareya de la guardia civil que marchaba a pie. La tarde del día 20 la xusticia consiguiera por fin un carru vieyu y estartaláu, tiráu por una mula tamién vieya, pa que'l verdugu nun tuviera que facer el viaxe andando. Pero al más mínimu repechu, Mayoral tenía que apease y caminar, cuando non emburriar un poco'l carruaxe xunto cola guardia civil, porque la mula sola nun nun tenía fuerces p'arrastrar el tresporte cuesta arriba. A les nueve la mañana entró aquella compañía en Grau. Había mercáu, y el bulliciu mañaneru suspendióse cuando los avistaron. Tol mundu pensó que yera'l reu de muerte que caminaba pa Tinéu conducíu pola guardia civil. Gregorio Mayoral paró na primer tabierna qu'alcontró y pidió de beber ente la compasión y el respetu de los parroquianos. Cuando'l taberneru diba pone-y una pinta de vinu, preguntó-y, como pa dar conversación, si yera'l que diba morrer a Tinéu. Mayoral contestó que non, qu'él yera l'executor de la xusticia. L'aire volvióse tiesto naquel llugar. El taberneru paró, retiró la xarra col vinu y el vasu, y dixo que nel so establecimientu'l verdugu nun bebía. Mayoral miró pal paisanu como calibrando lo que podía dura-y nel trance de da-y garrote, pero nun insistió; salió a la cai arrodiáu del silenciu, el miedu y el noxu de tolos presentes, que caminaron detrás d'elli peles cais de Grau. En tolos sitios onde entró, en toos ellos-y negaron cuanto pidió.

Compartir en Twitter
Compartir en Facebook