04 de mayo de 2010
04.05.2010

Tierra o paraísu

04.05.2010 | 02:00
Tierra o paraísu

Son eternos los tos güeyos.


Dacuando veo nellos l'ámbare


/d'una alcordanza:


la tierra, el sol, el sexu,


un escesu de lluz del estrarradiu


que traviesa un tren probe como'l


/final del mundu.


Dacuando un difuntu


temblor, una pallabra que nin


/siquiera esiste


faime revolveme tres d'ellos.


Veo entós el mio pelo, que ye castu


/como'l mieu


a morrer. Llévote de la mano, vientu


/virxen,


y ye visible l'angustia de nun ser


/más qu'un suañu.


La to mano palpa fríu, amor, sirenes,


y ordénesme morrer nel deliriu.


Ensin min, devienes llibre ferozmente


porque sólo yera esto necesario,


amar quiciás asina como llocos


o madres y críes de les rates.


Un tren parte de ti cola mio mirada


que ye la de to quiciás: penetra'l tiempu


qu'empéñase en valer lo qu'un suspiru.


Sicasí, son eternos los tos güeyos


y vamos apoderándonos de cada


/instante,


cada voz, cada lluz, cada presencia.


Descubrimos los valles profanaos


pol mitu creciente de la infancia,


l'azul d'un suañar con otra tierra


que ye Troya, nel so estruendu,


y ye too lo qu'aguarda al dexar Ítaca.


Con llume d'adolescencia cruciamos


/ermedales


onde pálides parres provocaron


la sede de viña ardiente


que tuvieron los tos llabios


cuando amaste de verdá.


Dicen que fuiste Naide ente unos brazos,


que fo así como urdiste -güeyos


/verdes, lleopardos-


la to venganza del tiempu. Tú falabes


/de venenu


que nun llega a dañar.


Mas tovía güei sabe la mio sangre


que nun hai fábula o mundu


que se pieslle a los tos güeyos.


Ondeen foles, arcos d'un branu infiel.


Son eternos los tos güeyos, espeyu de


/ficciones.


Son eternos los tos güeyos


y del tiempu la tierra o paraísu


nel qu'amamos.

Alejandra Sirvent


(1980) llicenciose'n Derechu pola Universidá d'Uviéu. Trabayó nel Institutu de la Muyer y fo vicepresidenta de l'Asociación d'Escritores d'Asturies. Impartió clases d'escritura creativa. Ye autora de los llibros Aquel Amanecer y Última materia.

Compartir en Twitter
Compartir en Facebook
Enlaces recomendados: Premios Cine