30 de octubre de 2018
30.10.2018

La visita

Güei, les más de les visites recibímosles a traviés de Facebook y otres redes sociales

30.10.2018 | 00:56
La visita

La pallabra visita préstame sobre manera.Tengo l'acordanza de cuando yera nena, lo que nos prestaba que llegaren visites a casa. Una gran ilusión esperar a dalguién pal filazón, esperar los que llegaben a ayudar a les sementeres o colleches, al esfoyón, a la mayada o pa facer el samartín. En sin escaecer les prestoses visites nes fiestes, cuando veníen familiares y amigos "de sopes". Estos díes permitíen disfrutar de poder contar, compartilo too, hasta la tristura o l'allegría y otros sentimientos. Pa los nenos, cuando dalguién venía a casa, yeren momentos especiales y mui esperaos.

Mui tienru yera'l momentu de dir lleva-y "la visita" a les muyeres cuando paríen. Daquella paríen en casa, y como la vida no campu yera tan dura, la parida tenía unos díes pa cuidase. Los familiares y vecinos lleváben-y la "visita" pa contribuir a que tuviera de too pa comer y dar lleche al nenín. Agora, colos partos nel hospital, perdióse esta costume y la "visita" son si acasu unes flores.

La "visita" yera más o menos abondante según fuera la rellación familiar. Los más allegaos llevaben una bona cestada de coses: mantega, vinu Sansón, chocolate, güevos, galletes, garbanzos, arroz, pan blanco y hasta una pita o dos. Les amistaes y familia más llonxana llevaben una "visita" con menos regalos. Eso sí, el chocolate, el vinu y el pan blanco pa facer les torrexes nun faltaba.

Otres visites que se me vienen a la memoria yeren les que s'ofrecíen y s'ofrecen a la Virxe y a los santos, sobre too a San Antonio. Cuando la xente se ve apurao, bien por dalguna enfermedá o por dalguna gafura que-yos ocurra na familia o al ganáu, ofrezse una "visita" a dalgún santu, al que siempre se-y lleva tamién dalgún presente, bien perres o una vela, o'l compromisu de dar una misa. En cada pueblu hai una santa o un santu al que se venera con más devoción, y son los que reciben les más de les visites.

Visitar a los enfermos tamién ye bona costume bien enraigonada ente nosotros. Una forma d'alendar a quien sufre y facéi compañía. Ye costume llevar dalgo pal enfermu, galletes, fruta o dalguna qu'otra llambionada.

La pallabra visita tien por veces otres connotaciones non tan prestoses. Aprópiome d'esti dichu popular: "Visita cada día, a la selmana hastía". Y eso quier dicir qu'hasta les visites más esperaes hai que saber dosificales. Too na so xusta midida.

Sicasí, güei lo que ta de moda ye visitar a traviés de les redes sociales, onde tenemos amigos y amigues virtuales a mamplén; cada poco contamos les visites que tenemos nos blogs o nes páxines web.

Pero toa esta llocura de les visites nes redes enxamás va suplir lo que tienen d'emotives les visites de siempre, muncho más cercanes y prestoses. Tristemente, el mundu ta enmudeciendo por momentos. Yá cuásique nun se fala na familia, y cuásique nun tenemos visites porque nos rellacionamos per Facebook, per Twiter o per Instagrán.

Dientro de poco hasta los santos van tener que crear un perfil en Facebook si quieren siguir recibiendo visites.

Compartir en Twitter
Compartir en Facebook
Lo último Lo más leído