Opinión

La cocina

Un espaciu que se foi tresformando nes últimes décaes

La cocina nes cases d'aldea siempre foi llugar de reunión. Un llugar espaciosu qu’amás d’utilizase pa cocinar y pa comer, sirve pa tar de tertulia los de casa dempués de los llabores diarios y asina falar de munches coses. La xente que llega al llar siempre se-yos pasa pa la cocina porque ye'l llugar de confianza. Ye onde se toma'l cafetín en compañía; un sitiu onde se ta a gustu, sobre too nel iviernu, espaciu que ta más calentín. Les coses tan cambiando. Dende hai unes décaes, la llegada de los electrodomésticos y otres comodidaes fueron invadiendo espaciu nes cocines y en munches d'elles hasta quitaron l'escanu, testigu de tantes siestes y de tantos filandones, reuniones familiares y vecinales, perdíes cuasique dafechu dende la llegada de la televisión a les cases

Nos pisos los espacios son bien diferentes. La cocina ye polo xeneral pequeña y ta enllena d'armarios, electrodomésticos y d'artiluxos de toa mena que vamos mercando. Pasamos nelles el tiempu xusto pa cocinar; más tiempu les muyeres y menos los homes, porque magar que los grandes chefs seyan homes, a diario les reines de la cocina somos les muyeres (y que nun se molesten los homes que yá garraron el garfiellu, que nun va por ellos). Acudimos a la hora de comer y llueu la cocina queda sola hasta la hora de preparar la cena. Les cocines modernes son muncho más fríes. Calienten les potes, pero nun se siente la calor que nos calez nes cocines de lleña y carbón, onde la güela presidía y supervisaba tolo que se facía. Y costaba-y abondo "dexar el garfiellu" (asina se dicía cuando nun queríen dexar el mandu de cocinar a las nueres). Agora yá esisten poques families estenses. Les pareyes moces nun gusten de compartir vivienda, inclusive nes aldees, présta-yos independizase y nun vivir colos padres y güelos baxo'l mesmu techu. Como siempre pasa, too foi cambiando, y espero que seya pa bien.

Les tertulies y filandones qu’enantes teníen llugar na cocina, agora son virtuales, fáense a traviés del móvil, qu’invadió tolos requexos y convirtióse nuna necesidá. Pasamos munchu tiempu guasapeando o "caleyando" peles redes sociales, tiempu en solitariu, anque nesi espaciu virtual haya miles de persones, munches que se dicen “amigues”, pero falta la calor de la tertulia na cocina de la casa, pol que sentimos cierta señardá. Xóvenes y vieyos deprendimos l'arte de guasapear, costume que ta enmudeciéndonos dafechu. Prauticamos más que nunca la escritura, eso sí, pero la mayor parte les veces pa escribir tochures, esa ye agora la nueva forma d'entretenimientu. Los filazones pienso qu'enxamás volverán. Siento que colos cambios d'estilu de rellacionase, va escaecese bona parte de la nuesa cultura: xuegos, cantares, cuentos y creencies, quedarán soterraos nel silenciu de les cocines xunto cola soledá de güelos y güeles.

Tracking Pixel Contents