Dicen los espertos en vampiroloxía que n'España hai más de 500 «vampiros nacíos» (non l.literarios). Después de sentir esta tertulia sobre vampiros a las dos de la mañana, cásique nun podía dormir. Quiciabes porque tamos, en ciertu mou, sensibilizaos con historias macabras qu'oyemos a diario nos medios de comunicación. Ta visto que too ya posible. Cada vez una entérase de más cosas raras, ya voi cayendo na cuenta de que lo que yá paez esceicional ya ser «normal» nesti mundu de bichos raros qu'andan sueltos por uquier. Ente nós hai exemplares de tou tipu, vampiros de sangre ya d'enerxía, estraterrestres que cualquier día l.liévannos hasta Marte o hasta la L.luna, bruxas ya bruxos, l.ladrones d'altor, timadores, traful.leiros, terroristas, maltratadores, violadores ya tou tipu de diaños que conviven con nós. Namás fai falta mirar unos minutos dalgunos canales de televisión ya darréu nos ponemos al corriente de tolas gafeces que nos amagan.

Volviendo a los vampiros que paez que caleyan ente nós con apariencia de «normales», seique tarán encantaos de ver tantas escenas sangrientas na tele. Estos días d'atrás los Sanfermines regaron las calles de sangre. Un muertu, venti cornadas, milenta revoucones, cien roturas de miembros... Da lo mesmo las cifras. Los Sanfermines son unas fiestas tan afitadas ente'l públicu, que ya como si se considerara normal tolo que pase. Nesti eventu, de riesgu, por mui guapu que nos lu pinten, la sangre tiñe las calles de roxo ya fainos escalafrianos. La muerte va de col.lacia colos participantes ya darréu deixa sentir la súa presencia. Sangre fresco en direuto. Sangre de los mozos que cuerren al.loucaos delantre de los toros engafentaos. Accidentes ya muertos provocaos, ya hasta xustificaos, pol placer de disfrutar d'emociones fuertes. Conseyos ya midíes de seguridá. Pero'l riesgu en sí ya lo qu'anima ya al.louquez a tolos que cuerren, al debalu, delantre los toros, inda sabiendo que la carrera pue tener fatales consecuencias. Ya asina, ensin reparu, na televisión amuésannos las escenas más duras, recreándose col morbu, nesta fiesta qu'abre la puerta a la muerte. La muerte en primer planu, ente'l recuentu de firíos, corniaos, pisaos ya demás. Ya ¡que siga la fiesta! Cola mayor naturalidá. El que pagó cola suya, mala suerte. Pal añu que vien más toros a la calle ya miles de mozos, ya non tan mozos, correrán al.louquecíos delantre'l toru. Histeria coleutiva, alimentada con alcohol, sueñu ya euforia. Los presentadores de televisión siguirán xustificando la muerte ya amosándonos a cámara lenta las imáxenes más tráxicas.

Ya deixando aparte la l.lienda de los vampiros, cola qu'encomienzo'l testu. Ya preocupante que nos mostremos impasibles ante socesos de tal calter. Cuando las tradiciones retan a la muerte bien tarían desaniciadas.

Aprovecho pa felicitar al Ayuntamientu de Castrillón por declaranos conceyu antitaurinu.