Esti sábadu 23 empiecen les oposiciones a profesores d'Enseñanza Secundaria prácticamente en toles comunidades españoles. N'Asturies, ofrécense 351 places. Equí al llau, en Galicia, salen 788 (y otres 705 pa maestros, y otres 106 pa técnicos de FP). En Navarra (seguimos namás con Secundaria), 325. En Baleares, 552. En Cataluña, 1602. En Vasconia, 1511. Dexando pa un llau la oferta asturiana, les demás qu'acabo citar sumen 4.778 places pa dar clase n'institutos. Son un bon puñáu d'elles. Y los asturianos, casi toos, por nun decir toos, nun pueden aspirar a sacales porque les autoridaes gallegues, navarres, baleares, vasques y catalanes (esti añu, na Comunidá Valenciana, toca oposición de Primaria), cola intención de favorecer a los sos conciudadanos, piden conocimientu de gallego, vasco o catalán acreditao por una formación de bachiller neses tierres o por una certificación de les Escueles Oficiales d'Idiomes.
En cambiu, toos y caún de los opositores que se presenten en Galicia, Navarra, Baleares, Cataluña o Vasconia tamién lo pueden facer n'Asturies, disputándo-yos les 351 raquítiques places a los opositores locales.
Esta situación, claramente desequilibrada, ye la que-y gusta a Mercedes Fernández y, polo visto, al Partíu Popular asturianu, qu'avisen de los tremendos riesgos que diba suponer que se pueda llegar a pedir conocimientu d'asturiano pa opositar al norte del Negrón.
¡Pues tamos meyor agora, entós!
miliorodriguezcueto.wordpress.com
