La Casa Real española anunció estos díes que la heredera al tronu va tar presente, en condición de princesa d'Asturies, nos actos que se celebren en Cuadonga, el 8 de setiembre prósimu, con motivu de los múltiples aniversarios d'esti 2018. L'aparatu organizador y la natural simpatía que causen los neños garanticen l'ésitu de la visita. Nun van faltar aplausos y vítores al pie la cueva. De toles maneres, nunca ta de más recordar qu'esi títulu, el de princesa d'Asturies, poco o nada tien que ver colos asturianos, que nun-y lu concedimos (tampoco al padre nin al güelu) nin se nos consultó tal cosa. Con razón, algún monárquicu puede argumentar qu'eses repunancies republicanes nun tienen razón de ser porque nobleza y democracia son linies paraleles euclidianes: nun hai interseción posible. La condición de rei, princesa, duque o marquesa nun ye gracia otorgada pol pueblu soberanu. Efectivamente. Lo único que puede facer el pueblu ye da-yos valor o negá-yoslu, siempre con una sonrisa irónica, nunca con un xestu violentu.
Pero, puestos a indagar nel títulu, la Escritura de Confirmación del Principado e Institución del Mayorazgo de Asturias que guarda l'Archivu Xeneral de Simancas pon lo siguiente, firmao de mano del rei Juan I de Castiella, León, Toledo, Galicia, etc., etc., y dirixío al fíu, futuru Enrique III: "...yo agora establezco, e fago en vuestra persona, e para vos, e después de vos para vuestro fijo mayor legítimo, e después dél para sus descendientes legítimos, todavía el mayor a quien debe venir la subcessión de mis Reinos y Señoríos, el dicho Principado de Astúrias por Mayorazgo...". Y sigue dándo-y derechos de señoríu, con recaudación de rentes y impuestos, y con atribuciones de xusticia. Y: "Sea Mayorazgo e Principado de los Infantes primogénitos de castilla e de leon para siempre jamas, los quales sean llamados Príncipes de Astúrias, y assí lo ayan e tengan por título..."
En virtú d'esti nomamientu, el primer príncipe d'Asturies fue Enrique III de Castiella, el Doliente, fíu, como queda dicho, de Juan I; y esti Enrique III casó con una Láncaster, Catalina, y tuvieron a Juan II, segundu príncipe; que tuvo a Catalina, primer princesa, que nun llegó a reinar porque morrió a los dos años; a la que sucedió nel títulu l'hermanu, futuru Enrique IV, l'Impotente, home de vida matrimonial cuestionada al que la tercer muyer-y dio una fía de paternidá duldosa, Juana la Beltraneja, y equí ya cuelga sobre ella la sombra de la lexitimidá ("...vuestro fijo mayor legítimo..."); pero una revuelta nobiliaria depunxo a la Beltraneja de los cargos y dignidaes en favor d'un tíu, Alfonso XII: esti, indiscutiblemente, ya nun tenía derechu al Principáu por falta de primoguenitura. Y menos tovía podía tenelu la siguiente princesa, futura Isabel la Católica, fía d'aquel Juan II d'anantes a resultes d'unes segundes nupcies. Asina que, incluso si la Beltraneja yera descendiente verdadera del Impotente, el títulu, de toles maneres, acabóse con ella ente los muros del monasteriu de Santa Clara, en Coímbra, onde pronunció los votos depués de perder, definitivamente, la guerra polos sos derechos familiares. Y si los Austrias descendientes d'Isabel la Católica ya fueron príncipes d'Asturies espurios, los sucesores Borbones, colocaos mañosamente n'España por güelito Louis XIV de Francia pa cubrir el güecu que dexare l'estéril Carlos II ¿qué parentescu tendrán con aquel Juan I que-y dexaba Asturies, como propiedá privada, al fíu mayor, y a los fíos mayores de los sucesivos fíos mayores? Y perdone usté la clase d'Historia.
Pero, pal casu, castañes. La futura Leonor I d'España (el títulu va tenelu con independencia de les sorpreses que reserve'l día de mañana) va tar presente en Cuadonga'l 8 de setiembre y, si ya resultaba vergonzosa una triple celebración, como si fueren fenómenos de rangu equivalente la reciente construción d'una basílica más o menos folklórica al pie de los Picos, la creación d'un espaciu natural protexíu d'ente les decenes de los qu'hai n'España (por más que fuere'l primeru) y la conmemoración de 1.300 años (¡1.300!) d'un territoriu/país que, lo más seguro, ye'l más antiguu d'Europa con entidá administrativa propia y continua; por si ya fuere poca concupiscencia entemecer sotanes, osos y guerreros medievales, agora vamos tener un cuartu y magnu acontecimientu que, nun lo dulde, va amatar estrepitosamente los otros tres nos medios de comunicación: la puesta de llargo d'una princesina. Pues mui guapo.
Faigan el favor: lo de la fundación del reinu d'Asturies, suspéndanlo. Igual la coyuntura ye más favorable pa celebralo dientro cien o doscientos años.
miliorodriguezcueto.wordpress.com
