La Nueva España

La Nueva España

Contenido exclusivo para suscriptores digitales

Esti güevu sal quier

Por fardar

Los secretos de Venta Cueli

Na Veiga, xuzguen a un paisanu por deshonrar a una yegua, cuenten los papeles. Si la voz popular pal menoreru ye "asaltacunes", nun va desencaminao pone-y a esti "asaltacortes", más tovía porque la yegua nun yera de la familia.

La historia tien el so aquel. L'interfectu, pa la comisión de la maldá, soltó los pantalones hasta los pies y, con esa traza, metió-y violentamente'l brazu a l'animala hasta la nación (porque a esa parte de la naturaleza femil ye a lo que los asturianos llamamos, tradicionalmente, nación, y non a otra cosa), prevocándo-y esgarriones amás d'un sustu importante, como ye de suponer.

Usté, como yo y como cualquiera, entrugaráse: "Y, pa facer eso, ¿por qué baxó los pantalones?" ¡Amigu, esa ye la clave del asuntu, lo que-y da verdaderu interés social! Pa ser breves: porque'l reu en cuestión ye un mentirosu. Esplícome: les yegües, de fábrica, vienen ensin retrovisor, da-yos trabayu ver el mundu a popa. Gachando la cabeza entorniada, escucando de llau ente les pates, la víctima d'esti triste casu pudo llegar a apreciar, allalantrones, alluendi'l rau, un par de canielles amarraes por unos pantalones recebaos en mierda fresco. Si a eso sumó la poderosa truñida del brazu penetrante, les conclusiones que sacaría dexaben l'ego del amante nun pedestal. A ver si soi más claru: el paisanu d'A Veiga quería fardar, delantre la yegua, de lo que nun tien.

Otro tanto, pamidea, ye lo de Luis Venta Cueli... ¡metafóricamente, nun me malinterprete, faiga'l favor! El vicesecretariu xeneral del PP asturianu (y veterinariu) afirma que sabe quién va ser el candidatu, o candidata, del partíu pa les autonómiques de mayu, pero nun nos lo quier decir. Ta fardando. Enséñanos los calzones pero lo que nos mete nun ye lo que tien, que nun debe ser tan grande.

El problema del PP autonómicu, abúltame a mi, nun ye que sobren voluntarios sinon que falten mártires. El desastre que prevén costipa les voluntades, arruina les disposiciones. Per equí anduvo, díes atrás, Andrea Levy, altu cargu del PP español y parlamentaria catalana, viéndose con Cherines. ¿Vieno a impone-y la inmolación? (¡Total, otra más?!) ¿O traía, al llombu, una discreta mochila paracaidista, consciente de que'l parlamentu catalán va camín de ser territorio esóticu pal partíu? Pal casu que fuere, son misterios estramontanos, "subpajarianos", mui grandes, paezme a mi, como pa que Venta Cueli participe d'ellos. Que suba los calzones o que nos enseñe lo que de verdá tien.

miliorodriguezcueto.wordpress.com

Compartir el artículo

stats