El grupu parlamentariu de Ciudadanos quier saber, de boca del conseyeru autonómicu de Sanidá, qué se ta faciendo pa combatir l'ansiedá de los asturianos. "Desde Ciudadanos estamos convencidos de que el 80% de los casos de salud mental, incluidos los trastornos de ansiedad leves y medios, se podrían resolver en la atención primaria si se dispusiese de los medios adecuados." Como soi un probe ignorante, igual nun lo entendí bien, pero da la impresión de que quieren sustituir al psiquiatra pol médicu de familia, que lo mesmo anda folgáu, arrascándose'l vademécum.
Siempre me llamaron l'atención eses estadístiques imaxinatives de les que son tan amigos los políticos. El 80%: "estamos convencidos". Y esi convencimientu, ¿qué base tien?, ¿a qué autoridá médica consultaron que-yos certificó: "8 de cada 10"?
Informen los de Ciudadanos que l'ansiedá ye mal crónicu n'Asturies y que lu padez el 16% de la población: otra estadística misteriosa, de la que nun se cita la fonte. Pero, cronificaos aparte, los de Ciudadanos suben l'apuesta: "Uno de cada cuatro asturianos tiene problemas de ansiedad y Asturias es la campeona en el consumo de antidepresivos y ansiolíticos." Yo nun sé por qué, cuando faen estes declaraciones alarmantes, nun les acompañen de la bibliografía consultada, que diba ser mui d'agradecer. Eso nun quier decir que nun esista, claro, asina que consulté en Google, que tolo sabe: "ansiedad + Asturias + 16% + ansiolíticos". Nada. Pero siguen avisando los de Ciudadanos: l'andancia ansiosa astur duplica la estatal, que, dividiendo ente dos el datu que dan, tenía que ser del 12,5%. Equí sí m'ayuda Google. Atopo un estudiu reciente d'una empresa farmacéutica que diz que son 4 de cada 10 los españoles afectaos y que, por autonomíes, los más estresaos (¡vaya, ho!, ¡siempre tienen que nos ganar en too!) son los catalanes. El diariu El Mundo, en 2017, esplicaba que nun hai estadístiques fiables pero que'l ministeriu de Sanidá calcula una incidencia del 5% al 10%. La web del Insititutu Nacional d'Estadística nun ofrez datos de consumu de medicamentos por comunidaes autónomes.
Vamos quedar coles ganes de saber de qué autoridá dimanen los númberos de Ciudadanos. Deber ser esta mesma que me permito citar a continuación:
"El 80% de les veces qu'un políticu de la oposición fai declaraciones públiques ye con ánimu alarmista: tamos convencíos. Consecuencia d'esi alarmismu, el 16% de los ciudadanos que lu sienten sufre episodios d'ansiedá".
¿Medicamos o prevenimos?
