La Nueva España

La Nueva España

Contenido exclusivo para suscriptores digitales

Esti Güevu Sal Quier

Moralidaes

La polémica del vetu parental nes aules

Cuando nun-y depende un gobiernu d'ello, el PP permítese facer de menos les pretensiones de Vox y da-yos el tratu que-yos correspuende: el de chorraes. Teresa Mallada declaró esta selmana que'l derechu de les families a controlar y aceptar o non los valores que se tresmiten a los fíos nel ámbitu escolar garantízase de sobra cola llibre elección de centros. Esa ye la cuestión: si, como pretenden los ultranacionalistes, y pa nun invadir supuestos derechos parentales, l'Estáu escluye de los programes educativos cualquier conteníu qu'una parte de la ciudadanía pueda entender como moral y, en consecuencia, tendenciosu, lo primero que tien que facer ye anular los conciertos educativos colos centros de la Ilesia: nun hai más qu'entrar na páxina web de cualquiera d'ellos pa comprobar que, de manera destacada, esponen los respectivos proyectos pastorales, y eso ye moralidá de gruesu calibre (más que la d'entepierna, que paez ser la única na que piensen los de Vox) sostenida con dineru público. Ye una opción na qu'un gobiernu progresista tien que pensar bien en serio: si hai que sacrificar cursinos de dos hores sobre identidá sexual a cambiu de dexar de financiar escueles de cures o de monxes... pues igual-y merez la pena da-y una vuelta a la cosa a esti gobiernu de radicales ateos y comunistes. Mallada, con más cabeza qu'Ignacio Blanco (ye una manera de parlar), nun tien munches ganes de ximelgar esi avisperu, que nunca se sabe qué picotazos se pueden llevar.

Con independencia de la nula consideración que merecen los esparabanes y les esclamaciones del nacional-catolicismu de Vox, nun ta de más decir que nun ye verdá que los docentes del sistema públicu aplaudan, monolíticamente, la política de "talleres" o cursinos complementarios que les administraciones animen a colar n'horarios de tutoría. Son munchos (bien d'ellos enclinaos de siempre a la izquierda) los que la consideren una invasión improcedente. Un ratín enantes d'escribir esti artículu, un compañeru d'institutu, tutor d'un grupu de Secundaria y votante tradicional a la izquierda del PSOE, arrenegaba de les tonteríes que tuvo que-yos sentir, en clase, a los monitores d'unes charles sobre identidá de xéneru, como que los médicos qu'asignen protocolariamente sexu a los recién nacíos enquivóquense porque ignoren si esi bebé se siente varón por tener pitu o fema por nacer con ratín. "¡Cago'n diez, y va parecer que yes un facha si dices qu'eso nun son más que gilipolleces y comederos!", encendíaseme'l compañeru.

Ún atristaya pensando qu'esti país sigue atascáu nes mesmes polémiques de sacristía de va un sieglu. La moralidá española sigue siendo de catecismu aunque, agora que l'afluencia a les ilesies va menguando, el campu de batalla tresládase al espaciu pel que tol mundu ta obligáu a pasar: les aules. Pero nin siquiera'l progresismu paez plantease qu'a los alumnos-yos venga bien un refuerzu moral con otra orientación más actual: que condene la mentira del poderosu, l'apropiación indebida de lo público, l'incumplimientu de les obligaciones fiscales del ciudadanu... Con eso puñen cada día les families d'estos chavales o d'eso pequen, y ellos mesmos paecen condenaos a continuar sufriendo o practicando talos vicios sociales. Pero ninguna ONG, estimulada con subvenciones, acude a les aules de Secundaria cola noble intención de romper esta cadena d'inmoralidaes. Pa esplicar qu'hai xente que s'echa con persones del mesmu sexu, sí. Eso, los neños ya lo saben y, mui mayoritariamente, tán llibres de prexuicios al respectu. Y non gracies a les charles de concienciación escolares, sinon a la tele, al Mauri de "Aquí no hay quien viva", por exemplu, que fexo más por la tolerancia sexual n'España que tolos programes educativos imaxinables. Quedamos a la espera de que Vox pida que se prohíba la reposición de la serie.

Cola ayuda de la Conseyería d'Educación y Cultura del Principáu d'Asturies

Compartir el artículo

stats