Tolos aspeutos rellacionaos cola educación son siempre motivu de controversia, porque la educación, como procesu de socialización de les persones, tien muncha importancia na formación del individuu ya implica una concienciación y unes normes de conducta que son "herencia" cultural de les xeneraciones anteriores, pero que col pasar del tiempu van evolucionando acordies coles nueves realidaes sociales, y va asina cambiando la forma d'entender el mundu. Van incorporándose otres normes, regles, y van algamándose otres formes de ver la vida.
El procesu educativu pue dicise que dura tola vida, pero ye na infancia y adolescencia onde tien una importancia especial y cuando necesita de la implicación de distintos estamentos como son la familia y la escuela fundamentalmente.
Educar nun ye llabor fácil. Son munches les teoríes pedagóxiques esistentes. Güei tenemos munchos competidores a la hora de tresmitir conocimientos, seyan educativos o d'otra triba, y sobre too a la hora de tresmitir valores, porque los neños tán espuestos a información y contradicciones mui variaes de les que ye casi imposible llibralos. Eso sí, hai qu'enseña-yos cómo los dixebrar, que tampoco ye fácil.
Poro, la importancia de fomentar l'espíritu críticu dende edaes tempranes, y procurar que les instituciones educatives ufierten a los neños y adolescentes información variada y que-yos sirva pa enfrentase colo que se van a alcontrar n'etapes postreres. De nada sirve tapecer les dificultaes, o la variedá de situaciones que-yos van a sorprender nuna sociedá complexa y enllena de tormentes, tanto afeutives como emocionales; una sociedá cambiante, y que nos caberos años se foi tresformando cola llegada de les nueves teunoloxíes, la llegada d'internet, redes sociales y otres anovaciones.
Los neños y adolescentes, debieren conocer les opciones que-yos ufierta la vida, los caminos, a veces pedregosos que van tener qu'andar, que van tener qu'escoyer y que naide vamos poder escoyer por ellos. Caminos qu' a vegaes-yos vendrán impuestos poles circunstancies que nos van socediendo. Tamién deprender a disfrutar de les coses que, de xuru, les xeneraciones anteriores nin siquiera maxinaron. Hai que preparalos pa vivir na sociedá de güei. Cada vez necesitamos más d'educadores bien preparaos pa da-yos pautes y deprende-yos a ser críticos y a seleicionar lo que ye válido o lo que ye falso, a cuestionase les ufiertes y propuestes manipuladores. La sociedá sufrió abondos cambios y sigue en continuu cambiu; trabayos en precariu, paru, drogadicción, violencia, families diverses, cambiu climáticu, espilfarru de recursos, reciclaxe, revolución xenética, consumismu y sobre too la revolución teunolóxica y otres novedaes sociales, cambiaron dafechu la realidá de la nuesa sociedá. Ye importante preparar a los neños y neñes pa que se vayan concienciando pa vivir nuna sociedá cambiante y plagada de contradiciones, y preparalos p'asimilar la incertidume del futuru.
La familia tien un papel incuestionable na educación, pero nun podemos escaecer el papel de la escuela tanto n'actividaes formales como complementaries, y magar caminen en xunto, los padres tán ehí p'afondar en ciertes cuestiones y dar respuesta a les entrugues que de xuru van palntega-yos y van tener que responder, pero enxamás pa privalos d'una información que-yos pertenez y que yá ta supervisdada por órganos de gobiernu de los centros educativos, como'l Conseyu Escolar, onde hai representación de les families. Los pas nun debieran convertise enxamás en censores, sinón ayudar a los fíos a procesar la información que reciben. Poro, el pin parental ta fuera de llugar.
