La Nueva España

La Nueva España

Contenido exclusivo para suscriptores digitales

Esti Güevu Sal Quier

Pingarates

El cartel del Antroxu de L.lena y otres caxigalines

Cachopos. Convócase otru concursu más de cachopos y apúntense 124 restauranes. Esto del cachopu ya ye, n'Asturies, una pasión y una marca identitaria. Pasando per Carreña de Cabrales esta selmana, vi un establecimientu que s'anunciaba como "cachopería", proclama tan reduccionista como apetecible, según pa quien. "Cachopu" conforma, xunto con "bable" y "guaje", la trinidá etimolóxicamente misteriosa del país. Ye cita frecuente que la referencia más vieya del términu alcuéntrase na obra del doctor Gaspar Casal, que ya da cuenta de la esistencia del platu nel sieglu XVIII. Déxeme aportar un granín d'arena al tema: en "El Victorial", de Gutierre Díaz de Games, obra d'alredor de 1436 que narra les aventures y fazañes del caballeru vallisoletanu Pero Niño, dizse que, siendo tovía mozu'l protagonista, retó a los nobles que servíen al rei de Portugal por una caxigalina: que si Badajoz caía de la parte d'esti reinu o d'aquel otru. Y ún de los que servíen al monarca portugués, que digo yo que sería Eduardo I l'Elocuente, retrucó-y: "¡Castígate, cachopo!", que vien a ser: "¡Pónteme delantre, que ya t'aprenderé yo lo que te falta por saber, chavalín!" Porque "cachopo", en portugués, val por "rapaz". ¿Y qué aportación ye esa a la etimoloxía astur?, dirá usté. Pues que'l caballeru qu'asina enfrió al gallu castellanu apellidábase Álvarez de Quirós. Ehí queda.

.ast. Veo, na tele, un anunciu del Gobiernu vascu nel qu'echen sidra, d'una pipa, nun vasu de los nuestros. "La route basque", ye como se llama la campaña promocional, reclamu pal turista francés. A mi, la verdá, nun me cabrea lo del vasu. Si'l vasu anchu de cristal acaba siendo vascu, bien que lo ganarán por andar más vivos que nosotros y bien que mereceremos que nos arramplen con esi símbolu patrimonial por agalvanaos (siempre nos va quedar el cachopu... ¡o non!). L'anunciu acaba con una dirección d'Internet cola estensión .eus, d'Euskadi. Xunta de Galicia: www.xunta.gal; Gobiernu vascu: www.euskadi.eus; Generalitat de Cataluña: web.gencat.cat... Yo nun duldo qu'esto de les estensiones autonómiques n'Internet va acabar siendo xeneral (.bal, .nav, .cyl...), y apuesto, tamién, a que .ast va ser la última, si ye que ta disponible pa cuando llegue'l momentu. "¡Qué gilipollez! ¡Otra tontería separatista! ¿Y pa qué val?" Pues... ¡yo qué sé! Igual pa nada. Nun ye más qu'un puñeteru símbolu, una cosa tonta, como poner una banderona d'España "king size" a 50 metros d'onde ya colgaba otra acorde cola normativa.

El bable de L.lena. La tradición polemista l.lenense col tema del bable / llingua / lo qu'usté quiera nun ye nueva. Ya tuvo en Jesús Neira, el difuntu profesor universitariu, un notable protagonista. Agora, el PP del conceyu protesta por un cartel del Antroxu nel qu'echa en falta'l castellán. Aleguen los conceyales populares (¡qué raro se me fai usar esti axetivu como xentiliciu políticu!) que la norma municipal pide que tola cartelería se ponga bilingüe. Yo creo que s'enquivoquen nesti casu concretu. El redactor del cartelu superó'l bilingüismu y produxo un híbridu que fusiona los dos romances hermanos con atrevimientu. Hai tantos castellanismos, sintácticos y estructurales, entemecíos nes poques palabres del anunciu, que decir que ta escritu n'asturiano ye muncho decir. Más que pa protestar, los conceyales del PP de L.lena tienen razones pa felicitase pol estropiciu bablista.

"Hacer novillos". Por seguir col tema lingüísticu (non "llingüísticu", que'l términu ye cultismu en tolos idiomes), llamóme l'atención la ironía que-y dedicó'l presidente Barbón al diputáu de Vox Ignacio Blanco: "Me alegro mucho de que no haya hecho novillos." Tengo pa mi que debe ser la primer vez en tola historia qu'un llavianetu usa la espresión "hacer novillos", en vez de la normal n'Asturies "pirar". El PP de L.lena, puestu de pies, aplaude.

Sayonara. El día que llegue'l virus definitivu, el qu'acabe con toos nosotros, namás se van salvar los nativos de la isla Sentinel del Norte, esa tribu del Índicu non contactada que fai escabeche con cualquiera que s'atreva a pisa-yos una playa. Nun se sabe qué sistema de gobiernu tienen pero, pamidea, manda Vox. Centrándonos nos virus mortíferos, ayer dába-y yo la mano a cierta persona cuando me vinieron dos iluminaciones fulminantes corriendo una detrás de la otra. La primera soplome qu'arriesgaba la vida con aquel actu de cortesía tradicional, mecanismu qu'aprovecha'l virus foín pa metésete ente les uñes y esperar ellí ocasión pa saltar cuerpu adientro. La segunda fue una particular madalena proustiana: va años, viví en Madrid una intrescendente escena orientalista que, mira tu qué cosa, encuevóseme pente les neurones, que deben ser les uñes del cerebru. Aquella vez, un turista nipón entrugóme, nun inglés tan discapacitáu como'l míu, por una dirección. Yo, como soi mui correctu, empobinélu; como nun soi madrileñu, nun sé pa ónde lu mandé. Lo importante ye que, satisfechos los dos cola comunicación, empecemos a facenos reverencies enérxiques, distantes y aséptiques, pa plasmu de la ciudadanía viandante. La reverencia ye'l futuru inmediatu. Sayonara.

miliorodriguezcueto.wordpress.com

Compartir el artículo

stats