Nun hai conmiseración pa col adictu. Un vecín de Xixón, que ye de suponer que mata toles hores del día a la ventana obligadamente folgáu pol enclaustramientu impuestu, observó xente entrando y saliendo d'un bar que tenía los cristales escurecíos con cartones. Esti émulu del fotógrafu qu'interpreta James Stewart en "La ventana indiscreta" debe ser d'esos que quieren pa los demás el mal qu'ellos sufren, asina que nun-y vagó llamar a la Policía. Personaos nel local acartonáu, los axentes vieron qu'aquello yera un comerciu de productos llibres d'impuestos. Detuvieron a ocho ciudadanos que, si bien se mira, nun facíen nada distinto de lo que fai la xente qu'esquilma les baldes del Alimerka: acudíen a por coses de primer necesidá. Que-yos entruguen a ellos si tienen más falta d'un rollu de papel de báter que del picu.
D'esta historia intrescendente, quédase ún cola figura del fisgón, la sombra amenazadora de detrás de la cortina. Sigue ente nosotros el sabichegu que, sentáu a la entrada d'aquel pueblu qu'imaxinamos del ayer, controlaba qué coches entraben y salíen, a qué hora se subíen y baxaben les persianes, si Fulanito saliere de casa pegando un portazu o si la neña de Menganita volviere de la villa pela mañana. Son lexón y nun se dexen urbanizar pola urbe. Una circunstancia escepcional, como la presente, devuélve-yos la idiosincrasia marutada de civismu. ¡Y menos mal que'l Gobiernu nun pidió colaboración ciudadana pa denunciar a los insumisos al toque de queda o a los tramposos del perru o'l carru de la compra!
Yo vivo nun décimu y, estos díes de trotes torgaos, subo y baxo les escaleres corriendo unes cuantes veces, mañana y tarde. Al torcer nel descansu de cada andar, nun puedo dexar d'imaxinar güeyos achisbando detrás de los fisgatos de les puertes. Y, por si acasu, enderezo, vertical, un deu corazón: antorcha olímpica pal estáu d'alarma.
miliorodriguezcueto.wordpress.com
