"Nos están tomando el pelo mientras la gente muere", declaraba algún de la docena de participantes na protesta de la plaza San Miguel d'Uviéu la tarde del miércoles 13. Nes ventanes de los pisos vecinos, sonaben cacharros de cocina y, pela pasarela circular de la plaza, pasaben moda patriótico abanderaos de capa, superhéroes rojigualdos, Super Españas ente los que s'infiltró, por nun se sabe qué afinidá ideolóxica o sentimental, un Super Rusia. Ún, que nació y criose notru tiempu, ve menos impúdico salir en pulguina a la calle qu'enseñando una bandera. A fin de cuentes, aquello desvela menos qu'esto de lo que somos.
"Nos están tomando el pelo mientras la gente muere", decíen. Esi mesmu día, nun hubo ningún positivu nuevu de coronavirus n'Asturies. Fallecimientos, ún. La mortandá pregonada polos protestantes (y pol ortodosu) nun s'axustaba a lo que realmente taba pasando na ciudá onde vivíen. Nun yera la crisis sanitaria lo que los sacaba a la calle, sub especie manifestante ruidosos, como un sindicalista cualquiera (¡si los güelos llevantaren la cabeza!), sinon el repudiu al Gobiernu de Sánchez, tildáu de lliberticida.
La llibertá, piensa ún, nun ye más que la coincidencia col que manda ensin mediar coaciones. Hubo persones llibres na España de Franco igual que les hai, agora mesmo, en Pyongyang. ¿Qué represión puede notar el que-y sal, de corazón, canta-y emponderances al poder? Esti ye un problema nominal de raigón estrictamente matemáticu: si la proporción de persones llibres ye pequeña nun país, pónse-y la etiqueta feísima de dictadura. Les democracies, imperfectes como toles creaciones humanes, tienen una virtú: eviten esa etiqueta. Siempre hai más ciudadanos llibres que reprimíos porque'l mandamás danlu una mayoría d'electores. Esta vez, tóca-yos sentise llibres a los votantes d'izquierdes. Mañana, como ayer, va ser a los de dereches y los papeles van invertise, porque la llibertá universal ye una entelequia. De toles maneres, mientres, y siempre, un esfuerzu d'oxetividá, faigan el favor.
miliorodriguezcueto.wordpress.com
