DTO ANUAL 27,99€/año

Contenido exclusivo para suscriptores digitales

ESTI GÜEVU SAL QUIER

Provincianismu

La manifestación n'Uviéu del 12-O

Como siempre que gobierna'l rojeríu, la derechona aprovechó'l 12 d'ochobre pa echase a la calle. N'Uviéu, acudieron unos cuantos ciudadanos a La Escandalera armando ruíu y enarbolando enseñes d'España a la sombra del banderón de Canteli, tal cual una llarada de pitinos revoltosos alredor de la pita madre que los guarió. L'argumentu de la concentración conozse bien de convocatories anteriores: la bandera ye d'ellos, l'exércitu ye d'ellos y el Rei ye d'ellos. Si nun lleven la razón en parte o en too, van acabar llevándola, pamidea, pero eso tampoco los va facer felices, que protesten pa reivindicase no que denuncien, y si la izquierda saluda la bandera, xiflen y, si nun lo fai, tamién. El nacionalista tien la oreya cuchada y nun-y lleguen les polifoníes.

Protagonizaba la concentración un cabezaleru con bonos fundamentos pa selo. Ignacio Blanco Urizar, flamante presidente p'Asturies del monosílabu ultra (les mios condolencies, Rodolfo Espina: tien que ser un disgustu descubrir que nun saques nin pa un tute de los que creíes compañeros), en mediu d'un corru d'acólitos nel que nun faltaba la subordinada y callada presencia femenina de la conceyala Cristina Coto (tan discreta que nin la citen los medios, ¡quién lo diba decir, colo qu'ella fue en Foro!), argumentó, fundamentalmente, qu'Asturies ye trasuntu de Madrid (que tamién ye d'ellos, según-y correspuende a la capital d'España, y non como consecuencia de la presente coyuntura política: ¡de manera esencial!). Por eso mesmo, por ser Caborana o Quirós lo que Boadilla del Monte o Las Rozas, y los coyanes o los moscones, a fin de cuentes, otros talos alcobeldenses o villaviciosinos (d'Odón), los ciudadanos d'esta Majadahonda Norte guardada tres del Negrón nun nos vamos someter a la dictadura barbónica que nos taraza les llibertaes, sentenció Blanco Urizar.

Nun sé. Ún nun-y tien más ascu a Madrid qu'a París (y eso ye un piropu) pero nun acaba de vese gatu. Y da-y por pensar que tener falta del otru pa entendese la figura, ponga usté de Madrid pa sacar conclusiones d'Asturies, o de Baleares, o d'Extremadura? ye un rasgu que se llama provincianismu. Y, el partíu políticu que lu muestra, provincianu.

miliorodriguezcueto.wordpress.com

Compartir el artículo

stats