–Taba visto.
–¿El qué, ho?
–Lo de Biden, Ramón. Yo namás sentir lo de Wisconsin…
–¿Lo de quién, ho?
–Yera clave, taba visto. Missouri y Nebraska son otru rollu. Pero Wisconsin…
–¿Qué, ho?
–Ye un estáu clave, Ramón. Les coses como son.
–Ah.
–Y de Wichita nun te digo na.
–¿Entós?
–Los de Wichita van a su rollu. Si tuvieran los güevos que tienen en Michigan dígote yo que…
–¡Qué finu yes, Herminio!
–¿Por?
–¡Sabes la de Dios!
–Home, entre yo y el mi cuñáu somos especialistas en too.
–¡Fae falta gente como vosotros, que tais de leer prensa, de oír el arradio…!
–Ya. Pero son necios, nun nos faen casu.
–¿Quién, ho?
–Llevo diciéndolo una pila meses: ¡el virus muta, oveyas! ¡Muta! Ni putu casu.
–Pero…
–Veslos en tertulies, en programas, en les redes y dan pena.
–Ya. ¡Ta la vida complicá, Herminio, mui complicá!
–En tres días salvaba yo el planeta, fíjate lo que te digo.
–Calla, ho.
–Aquí onde me ves, paseme cuatro noches pendiente del conteo.
–¿Del qué, ho?
–Los votos, Ramón. Digo: estos palman.
–¿Quiénes, ho?
–Los dos: ún con 74 años y el otru con 77, y un final de infarto.
–¿Pero fue pa tanto?
–Ahora Trump anda pidiendo el VAR. Tando en la Casa Blanca ye normal.
–Uf. Nun das puntá sin hilo, eh.
–Yo soi mui finu, dígote la verdá, tenía que tar nel establishment.
–¿Ónde, ho?
–Si yo fuera más influyente controlábase la pandemia echando hosties.
–No sé, no sé…
–¿Tú sabes la pila reportajes, documentales, tertulies, estaos del feisbu y cartes al director que veo cada día yo?
–Home, Herminio…
–¿Van hablame a mí ahora de Wichita, ho?
–Home...
–¿Van contame lo que ye la segunda ola?
–Oye, no…
–Yo, Ramonín, lo mismo te aplano la curva que te gano la Costa Oeste.
–Calla, ho.
–Y si te cuento les mis investigaciones al rey emérito…
–¡Ye increíble!
–¿El qué?
–Desde que cerraron los chigres y pases mañana, tarde y noche en casa viendo la tele yes otra persona.
–¿Por?
–Yes todólogo, Herminio. ¡¡¡Sabes de too!!!
–¿Van hablame a mí de Wichita? ¿Van hablame a mí de Wisconsin, ho?
www.parandoenvillalpando.com
