–Nun lo tengo claro. Voi necesitar un justificante, Evelio.
–¿Pa cruzar el descansillo, Rogelio?
–Home, nun tenemos vínculo familiar.
–Ya, coño, pero…
–Sería una reunión extradomiciliaria, una cenona con no convivientes.
–Pero tú, Rogelio, yes mui cercanu a mí.
–En parentesco no, Evelio.
–Pero en amistá y tratu sí, Rogelio.
–Si casi nun coincidimos ni en les reuniones de la comunidá.
–¿Y qué?
–Coño, y en Nochevieya quies invitame a cenar!
–Yes el más allegado que tengo, Rogelio.
–¿Tas fiju? Nun sé yo...
–Tú vienes y cuando entres a mi casa anúnciote: allegado Rogelio.
–Pero...
–Y si vien el tu fíu: allegado Tinín. Y así.
–No sé, nun lo veo claro.
–¿Cómo nun vas ser allegado si vivimos puerta con puerta? Nesti portal tamos Dora, tú y yo.
–¿Quién, ho?
–La borrasca, Roge. Y tu y yo, separaos los dos.
–¿Y Marcelina, la del pisu d’arriba?
–Garró’l coche y marchó.
–¿Pa Luanco?
–No, pal autocovid. Últimamente, ye pa lo único que garra’l coche. Tenemos que ser fuertes. Tar juntinos. Saldremos mejores, Rogelio.
–¡Majaras, Evelio!
–¿Qué, ho?
–¡Saldremos majaras! Esto de salvar la Navidá ye una chifladura. ¿Viste a Leticia Sabater zumbándose a Papá Noel?
–Esa taba chiflá cuantayá. Acuérdate de “El polvorrón” y “Trínchame el pavo”.
–Ye la nuestra Mariah Carey, hai que se joder.
–Tienes les llaves de mi casa y yo de la tuya. Yo riégote les plantes, tu cuídesme a la gatina… Rogelio, nun voi dexate cenar solu.
–¡Bah! Si renuncié a les piragües y a San Timoteo, ¿qué más me da...?
–Son feches señalaes, ho. Y tú, Roge, yes mui sensiblón, selo yo.
–Na. Pa cenar esi día lo importante ye…
–¡Les cuatro emes, Rogelio!
–¿Qué cuatro emes, Evelio?
–Mascarilla, manos limpies, metros de distancia y marisco tráeslu tú.
–¡Home, no me jo…!
–¿Qué ye? Nun voi ponelo yo too. Depués de la última derrama toi sin...
–¡Seré allegado, pero no gilipollas!
–Oye, si quies quedate a dormir en mi casa pa evitar el toque de queda…
–¿Tas queriendo decime algo, Evelio?
–Na. No sé, que yes tú más allegado que mi ex…
–¿Que qué, ho?
–Siéntote cerca, puerta con puerta…
–¿Gústate la fideguá?
–¡Tira p’allá, Evelio, tira p’allá!
www.parandoenvillalpando.com
