1.- L’ayuntamientu d’Uviéu quier face-y un homenaxe a la bandera d’España izándola nuna escuela pública la Selmana de les Fuerces Armaes. ¡Actu emocionante, quién lo discute! Yo tenía un alumnu venezolanu que me comentaba, señardosu, cuánto lo echaba en falta. Na República Bolivariana faise tolos díes enantes d’empezá les clases colos escolinos en posición de firmes, esplicábame, suspirante. Sí, señor: l’amor pola bandera ta percima, o al marxe, de la legalidá moral del cargu. Nicolas Maduro, presidente de la República vía magullu, y Alfredo Canteli, alcalde democráticamente electu, coinciden nun vínculu simbólicu: l’apreciu pola enseña nacional. Tien qu’haber un cultismu pa esi rasgu, pa esi sema compartíu… ¿Homosemafilovexiloloxismu? ¡Uf, qué difícil! Y, amás, empieza por homo. Meyor nun vestir a Canteli con esi ropón verbal y dexalu, escuetamente, en “abanderado”. Volviendo al actu entamáu pol ayuntamientu de la capital, a ún preséntense-y duldes. Por poner un casu, y sabiendo que los ayuntamientos tienen obligación nel mantenimientu de los centros escolares de Primaria, ¿esos confier-yos atribuciones pa entamar iniciatives qu’afecten al ámbitu pedagóxicu? ¿Nun ye cosa de la conseyería d’Educación aprobar esti tipu d’actividaes? ¿Pueden realizase nun cursu nel que la presencia de persones ayenes a los centros docentes ta radicalmente restrinxía como medía de prevención sanitaria? Viennos a la cabeza cuando, va bien poco, les autoridaes educatives de Madrid vetaron la visita de la ministra Irene Montero a un institutu xusto con esti argumentu. Y lo mesmo, al tiempu que s’iza la bandera nel patiu de recréu, hai profesores díscolos que manden arriar persianes. Tamién se puede dar el casu de qu’algún padre lo considere adoctrinamientu. Ya se sabe: hai xente que nun comparte l’homosemafilo… eso qu’emparienta al bipartitu carbayón col Gobiernu bolivarianu. ¿Pin parental? Nun sé… Ún camienta que cada cosa tien el so sitiu. Si nun queremos imaxinar a los soldaos del Cabo Noval dándose la queda nel patiu d’armes o bailando’l corru la patata, igual tampoco procede tresladar actos castrenses al patiu de recréu d’una escuela. Habralos qu’hasta digan que ye una especie de Formación del Espíritu Nacional que-yos quieren colar a los neños, y a les families, pela puerta d’atrás.
2.- Que llevante la mano’l que nun rocea, anque seya namás un pucuñín, de la vacuna d’AstraZeneca (de poco p’acá, Vaxzevria). Al respectu d’ella, hai bien de cuestiones intrigantes que-y ronden pela cabeza a esti probe escribidor. Por nun ser pesáu, voi limitame a tres: una de carácter semánticu, otra matemática y una tercera metafísica. La semántica ye qué coimes significará eso de que les ventaxes d’esta vacuna superen a los inconvenientes, cuando los inconvenientes son un ingresu hospitalariu n’UCI con opciones a palmar. Ún siempre pensó que, pal individu, el peor inconveniente ye la muerte. Pa doña Economía, non, claro. ¡Como ye inmortal! Pues que la pinchen a ella con AstraZeneca, ¿oísti? Segunda intriga, la matemática: repítennos esa estadística según la cual la posibilidá de que sufras un trombu si te vacunes con AstraZeneca ye de 1:1.000.000. Pero esti probe ignorante, por selo, lle la prensa con atención y vio que, cuando los alemanes, estos díes d’atrás, rectificaron los criterios de vacunación con esa marca, usárenla en 2.700.000 persones, y salíen-yos 31 trombos, nueve d’ellos con defunción final. Garré, entós, la calculadora, y salióme 1:87.096, que ye una proporción mui distinta. Cuando escribo esto, n’Asturies nun se lleven puestes 25.000 astrazeneques y hai dos casos sospechosos, el primero desgraciadamente conclusu con fallecimientu. Y eso ye 1:12.500. Usté me dirá. Claro que les autoridaes sanitaries asturianes dicen que’l trombu de la fallecida nun tenía gota que ver cola vacuna, y eso llévame a la tercer cuestión: la metafísica. Llámola asina porque anda pel mediu la diosa Fortuna. ¿Quién, si non, tien poder pa que toos estos trombos casuales, que nos aseguren que son ayenos a AstraZeneca, solo los sufran persones que punxeren, nos díes previos, esta vacuna, y non ninguna de les otres? ¡Ai, Fortuna, qué enredaora yes!
miliorodriguezcueto.wordpress.com
