Equidá

La Direción Xeneral d’Ordenación Académica de la conseyería d’Educación pasó a llamase tamién, con Carmen Suárez, d’Equidá. Agora, el Tribunal Superior de Xusticia d’Asturies falla contra la conseyería xusto porque considera que les instruciones impartíes a los centros docentes pal presente cursu 2020-2021 son contraries “a la educación inclusiva como principio de equidad”. Vien a decir qu’eses instruciones piensen nel grupu y non nel individu. ¿Cómo interpretarán esta sentencia les families de colexu Santa Olaya, en Xixón, que lleven tiempu protestando poles situaciones imprevisibles y hasta violentes que causa un alumnu, polo visto tamién de necesidaes, qu’obligó a solicitar, ya dos veces, la intervención de la Policía, fechu escepcional nuna escuela de Primaria? Piensa ún que l’equilibriu del conxuntu del grupu, l’alegría y despreocupación cola que los neños tienen qu’asistir a les clases, tamién cai baxo’l paragües d’eso que se llama, pue ser que con un aquel de demagoguia, equidá. Nun hai contradición ente mirar específicamente por un alumnu que lo requiera y beneficiar al grupu. L’atención personalizada y por un especialista a un escolar con dificultaes redunda en favor de la unidá a la que pertenez anque namás seya porque descarga al profesoráu d’una obligación d’ente les munches que lu afueguen y, en consecuencia, dexen que se centre, un poco más, nes otres. Aquel refrán castellanu que diz “quien mucho abarca, poco aprieta” describe, a la perfeción, l’actual actividá docente nos cursos de Primaria y Secundaria. Los profes trabayen nun permanente y estresante estáu de dispersión impuestu pola administración educativa que, complaciente colos ideólogos d’una pedagoxía utópica pero, al empar, contando les perrines una a una, amontona ocurrencies feches responsabilidaes perentories siempre enriba’l llombu de los mismos: la tropa d’a pie, los que se mueven ente los pupitres, los que nun tán en condiciones laborales de negase a nada. Voi citar, literalmente, parte d’una conversación reciente con un colega de Secundaria, y aviso per delantre que s’usaron espresiones poco decentes, pero bien docentes, porque l’estáu d’ánimu del gremiu nun ta pa otra cosa nin tampoco la situación merez refinamientos retóricos: “¡Joder, que yo puedo poner la mejor disposición del mundo, pero, tío, tampoco estoy cualificado para atender, en el mismo grupo, a un autista, a una hiperactiva, a un drogodependiente, a dos críos en riesgo de exclusión social, a cinco repetidores y a la madre que me parió! ¡Y atención personalizada para cada uno de ellos, no te jode! ¡Y papeles dando cuenta de todo! ¿De qué coño van estos politicastros de mierda? ¡Se les llena la boca con lo de la atención personalizada cuando les ponen un micro delante pero no es más que una puta mentira!”