Suscríbete

Contenido exclusivo para suscriptores digitales

Milio Rodríguez Cueto

esti güevu sal quier

Milio Rodríguez Cueto

¡Punk!

L’anunciada reforma del Estatutu d’Autonomía

A la xente (a casi tola xente) gústa-y estrenar: ropa, coche, casa, amores… ¡Estrenar! Nun tien por qué chocanos qu’al presidente Barbón-y apeteza estrenar Estatutu d’Autonomía. Esti miércoles púnxo-y fecha a l’arrancada del procesu, anque fuere de manera borrinosa: en saliendo de la pandemia. En pandemia, ya se sabe, hubo poco qu’estrenar. Ente los confinamientos, el focicu tapáu y les incomodidaes pa poblar peles tiendes, nin ganes teníemos de ponenos guapos, de mercar nada (por muncho que nos enguizó Alfredo Canteli), poca ropa nuevo llucimos nel últimu añu. Agora, por fin, paez que va tocar vengase. Pues a lo grande: estrenando Estatutu.

Otru asuntu son los gustos. Puestos a estrenar ropa, hailos de jarsetín de picu y hailos de chupa de cueru. Y hailos, tamién, de jarsetín de picu que, pa poner chupa de cueru, cámbien-y el nome: “perfecto”. L’Estatutu del presidente Barbón, ¿será jarsetín de picu, chupa de cueru o “perfecto”? Nun cuesta imaxinar que’l bloque supremacista lingüísticu presente na Xunta Xeneral (PP – Vox), que paez más de jarsetín de picu, venga como venga la nueva redación, va ve-y traces de chupa poco prestoses, por aquello de qu’incluya la cooficialidá de la llingua asturiana (¡como si’l rock & roll venciere pal llau del bable: que-yos lo pregunten a Jorge Ilegal o a Carlos Martagón, el de los Stukas!). Y lo mesmo va dar que se presente como “perfecto” amestándo-y al sustantivu “oficialidá” l’axetivu “amable”. Como l’enfrentamientu estéticu jarsetín / chupa va ser inevitable, y como, según anunció ya Barbón, la reforma va dir alluendi l’estatus legal de la llingua, esti probe ignorante, lo peor del arbitrismu más desnortiáu, atrévese a propone-y al presidente una estratexa que podíemos denominar, nun idioma más fácil d’entender pa Mallada o pa Ignacio Blanco que’l vernáculu d’estos valles, “The Ultimate Reform Unnecessarily Redacted Urgently” (TURURU), que consista en cebar el nuevo estatutu con toles barbaridaes y atrevimientos imaxinables, lo más sensato, por poner un casu, legalizar el consumu de maría ente conductores de tresporte escolar n’actu de serviciu. Quiero decir, señor presidente, que, ya puestos a aguantá la segura y cafiante murga de que si reforma sí o non, asina o asao, de que si denuncio nel Constitucional o llevántome de la mesa y marcho, de que si nos engarramos los mods colos rockers… ¡por favor, que la escentricidá de la pieza compense la torpeza de los intérpretes! ¡Punk!

miliorodriguezcueto.wordpress.com

Compartir el artículo

stats