Suscríbete

Contenido exclusivo para suscriptores digitales

Xuan Xose

Rocada colunguesa en Bueñu

Xinto cola muyer, Elena, y Sixto y Ana, amigos y collacios de siempre, en Bueñu, Colunga. Ente otres coses, damos un repasu a la historia humana y económica de la zona costera del conceyu. Entamamos –tamos al dellaú– pela Isla, y, sobre comentar cómo s’impuso esti nome al de “castru”, que ye’l vocablu col que tolos naturales llamen al accidente que-y da nome al llugar, recordamos qu’ellí existen restos d’una villa romana y una lápida dedicada a Mitra.

Si caminamos hacia La Griega, pasáu Güerres, atopamos La Villeda, un monte que fue un castru. Ye posible qu’el mesmu nome de La Griega quiera dicir eso mesmo, “castru”, “fortaleza”. Pero, sobre too, recordamos que na costa ente la playa y Güerres atopamos güelgues de dinosaurios. Naturalmente, ello afálanos a camentar, allá enriba, en San Telmu, el Muséu del Xurásicu.

Camín de Llastres atopamos el ríu y playa del Astuera (otru nome prerromanu, en rellación col d’Asturies, “ríu”). Ellí afayamos restos de lo que fue un embarcaderu de carbón que venía per vía aérea de les mines de Carrandi. Ehí tamién hubo, al entamu del XX, un astilleru.

En Llastres, la señardá llévanos a recordar les fábriques de conserves (dalguna en murueques, otres convertíes n’hoteles o restaurantes) onde trabayaron centenares de muyeres, asina como a camentar l’amenorgamientu del númberu de pesqueros y pescadores, paralelu al crecimientu y seguridá del puertu. La parte antigua del pueblu rellémbranos la riqueza de la piesca y del comerciu dende’l XVII.

Y ello invítanos a considerar cuála ye güei la estructura económica de Llastres. Como en tantes partes, les pensiones son el renglón principal, al que siguen hospedaxes y hostelería. Tamién camudó la cadarma la población, con predominiu la xente de mayor edá. Y novedaes: l’apaición de prietos (dedicaos a la piesca, dalgunos), hispanoamericanos (a cuidaos y a la hostelería, principalmente) y, inclusu, la presencia notable de xente del Este como empresarios hosteleros.

Compartir el artículo

stats