Cuando lo vi la primer vez pegué un surtíu na siella: “la Conseyería de Sanidá quier acabar cola visita social a los enfermos hospitalizaos”. Bueno, pensé, será un comentariu marxinal, pero llueu, al ver les disposiciones que se tomaben en tolos ámbitos pa esaniciar dalgunes de les restricciones de la pandemia, volví tópalo. Efectivamente, Sanidá (el Gobiernu, digo yo) quier acabar cola “visita social” a los hospitales.
L’arbitrismu, el proponer midides o remedios que tienen más que ver coles ideaciones del que les propón que cola realidá o cola capacidá de solventar los problemes de la realidá, ye una llarga tradición española, que vien de los Sieglos d’Oru. Pero l’arbitrismu va envueltu tamién nuna pulsión autoritaria, especialmente cuando l’arbitrismu provién de quien manda o pue mandar.
Nestos últimos tiempos esa pulsión por organizar la vida y les idees de los demás vien tomando un incrementu tan notable como insufrible. Desurde na derecha, sí, pero especialmente na izquierda. En realidá, lo que define nos últimos tiempos a la izquierda ye, más que les polítiques económiques empobinaes a la equidá y la igualdá, la pulsión por ordenar vides y mentalidaes, llexislando dende’l BOE, adoctrinando dende la escuela y les redes sociales. Curioso ye que, además, munches de les propuestes arbitrista-autoritaries de la izquierda provengan d’un estáu que, en xeneral, tienen como l’exe del mal: EEUU.
Ún nun entiende que tien de malo la “visita social” a los enfermos, y nun creo yo que palpite nel fondu d’esa voluntá la d’atacar lladinamente una de les obres de misericordia de la Ilesia Católica, “Visitar los enfermos”. Si fuere asina, que nun lo creo, menuda tochura.
Entiéndese perfechamente que Sanidá trate d’acabar con situaciones del pasáu onde se xuntaba nuna habitación una catrapada de persones, molestando al visitáu si nun taba mui allá, y a lo meyor, fastidiando al vecín, que taba más p’allá que p’acá. Pero pa eso basta con llimitar el númberu de visitantes por habitación nun mesmu momentu.
Nes nueves normes de visites hospitalaries, amplíase’l númberu d’hores que se pue visitar a un enfermu, pero, al tiempu, llimitase a una la persona que pue vistar nel día (o, polo menos, asina lo interpreten dellos hospitales). Nun ye posible, entós, que, ensin dexar de tener una sola visita a cada vegada, puedan visitar al enfermu delles persones, turnándose. ¿Y qué pasa, per otru llau, cuando’l prósimu, poles razones que sea, nun pue disponer más que d’un tiempu llimitáu? ¿Nun se castiga asina al enfermu?
¿Y por qué nun pue haber eses visites turnantes de fíos, hermanos y parientes? Eses visites nun solo calmen la esmolición de los parientes pol estáu del familiar prósimu ingresáu, animen y distraen al enfermu, que, nun se nos escaeza, pasa venticuatro hores, siete díes a la selmana, “en prisión”. Y permiten facer fluir ente unos y otros la empatía, el cariñu y l’amor, que son remedios pal ánimu, si non pa la cura. Pero, anque nun fuesen les visites de parientes cercanos, ¿qué tienen de malo les visites de vecinos y conocíos? ¿Por qué la sociabilidá, una de les virtúes que calteriza, de momentu, a la sociedá española ye mala? ¿Nun ye, al mesmu tiempu que vínculu emocional, sofitu munches vegaes d’ausilios ente unos y otros?
Podíamos pensar que hai neses restricciones (inxustificables) de Sanidá un ciertu interés egoísta, al sostener que “la visita” debería facese, precisamente, nes hores nes que’l visitante pudiere ayudar a dar la xinta al enfermu, lo que vendría a sumase a un sentimientu de que les mesmes visites son una molestia.
Non, más que cuestiones d’orde o de necesidades del enfermu, nesi discursu contra la “visita social” llate una visión ordenancista, ideolóxica si quieren, que va contra la sociabilidá y contra l’interés, d’afectos y d’entretenimientu, del propiu enfermu.
Y apaézseme na pantalla el mio trasgu particular, Abrilgüeyu, que durante la pandemia tuvo dafechamente desapaecíu: “Ye qu’hailos –dizme-, que-yos gusta más mandar… (llarga pausa) qu’eso.
Al so delláu, una que nun conocía y que paez trasga, de la que nun tuvieren la delicadeza de dame’l nome. Lo que sí sé ye que nun ye muda, polo que dixo:
-¿Pero ye que nun ye lo mesmo pa munchos d’ellos?
