Guerra urbana

Perdóneme usté la rima, pero lo d’Uviéu mete mieu. La sensación d’odiu interno y rancio que tresmite l’ayuntamientu paez nun tener equivalencia nos demás d’Asturies. La guerra de la nomenclatura viaria constátalo. Ún entiende que les denominaciones propuestes pol anterior gobiernu municipal podíen resultar una píldora mui gorda pal gañote estrenchu de la Vetusta de Clarín, siempre sollerte contra les novedaes por más que pigarciosa. Uviéu ye una ciudá conservadora, proclámalo la so historia electoral, y usa-y los nomes de les calles pa componer un cantu al progresismu, como pretendió aquel tripartitu d’izquierdes, nun dexa de ser traicionala, marutala. Pero’l péndulu, na capital, nun conoz la verticalidá, y agora causa tamién dolor o risa, según pa quién, la propuesta del actual bipartitu de dereches. Publicaba LA NUEVA ESPAÑA, va poco, los cambios. De les 17 calles disputaes, la izquierda dedicaba seis a poetes y narradores; la derecha, cero. La derecha acordose de tres empresarios; la izquierda, de ningún. A diez calles quería pone-yos nome de muyer la izquierda; la derecha, a una. Hai empate recordando mártires: la derecha a un asesináu pola ETA y la izquierda a unes fusilaes pol franquismu. En materia de profesiones liberales, 2-0 pa la derecha (los dos médicos: nun ye datu que facer de menos). En científicos, cambiu de cromos: la derecha quita al qu’enunció la teoría de la evolución y pon un bioquímicu que tamién trabaya’l campu de la salú. Relixón: un cura de la derecha por una pila d’ateos de la izquierda. Bable: la derecha sustituye a una profesora universitaria que punxo clase de castellán n’universidaes de dientro y fuera d’España pero que cometió’l pecáu d’escribir un par de cosines n’asturiano va cuarenta años, por un profesor de la d’Uviéu que dedicaba les clases d’últimu añu de carrera a mandanos a los alumnos (nótese qu’uso la primer persona del plural) lleer en voz alta “Adiós, Cordera”, como si fuésemos neños de Secundaria, pero, eso sí, fue notable opositor a la normalización del bable. La derecha fai-y un guiñu a la monarquía dedicándo-y calle al que fue presidente de la Fundación Príncipe de Asturias; la izquierda facía-ylu a la Segunda República na figura de les sos maestres. La derecha pon-yos calle a un libretista de zarzuela y a una diseñadora de vestuarios que colaboró cola temporada d’ópera del Campoamor; nun hai música nes plaques de la izquierda. Cuatro nomes propios de los propuestos pola izquierda tienen una bibliografía marcadamente feminista; nun hai ninguna referencia d’esi campu na resolución de la derecha. Y, depués, ta lo de los maestros nacionales y les maestres de la República. A ún, que ye fíu d’una maestra nacional qu’anduvo arrastrando madreñes per una montonera de pueblos perdíos del interior d’Asturies, da-y pena, particularmente, que se faiga munición ideolóxica de docentes (y más de docentes que bregaron contra les enormes dificultaes d’una España subdesarrollada, lo mesmo enantes que depués de la Guerra Civil). Maestres de la República y maestros nacionales merecen igualmente respetu, nun ye razón que ninguna de les dos categoríes desplace a la otra. Bien fácil resultaba unificales baxo una etiqueta única: maestros (o maestres) rurales, qu’eso fueron mayoritariamente unes como otros.