Empiecen a llegar a les aules asturianes menores procedentes d’Ucrania. Cuéstame llamalos alumnos, porque esa ye una categoría onde se mecen la voluntá y la norma, y ninguna de les dos coses tien nada que ver col casu de los qu’escapen d’una guerra. En realidá, nun son los primeros. Nos años 2018 y 2020, esti que firma recibió, na xefatura d’estudios del institutu de Xixón onde trabaya, dos mocines sucesives que, eses sí, acabaron siendo alumnes, y meritories. De families rusófones, procedíen del este del país y guardábales estatutu de refuxaes polítiques. Dieron, como domiciliu, el d’un conocíu centru d’acoyida local, onde residíen con hermanos, madre y padre, una d’elles, y ensin padre, la otra: prudentemente, nun indagué qué fuere d’él. El traductor de Google echó una mano pa los trámites de matrícula y l’únicu momentu en que’l desamparu-yos endelgazó fue cuando-yos apurrí los llibros de testu de Secundaria, y les neñes y les families respectives echáronse enriba’l de Matemátiques, como’l náufragu que s’agarra a un maderu, pasando fueyes y señalando, con satisfación, les operaciones reconocibles.
Empiecen a llegar a les aules asturianes menores procedentes d’Ucrania, digo, y a ún abúlta-y un despropósitu, otru casu en que la benevolencia manca. Evidentemente, el sustu de los rapacinos cuando sufran, acogotaos, una sucesión d’hores ensin subtítulos de les que poco o nada van sacar, nun va facer más qu’engorda-yos la depresión qu’arrastren por esti esiliu repentín. Inglés o Matemátiques pueden tener un pase, según el nivel educativu, pero piense usté en Sociales, Lengua Castellana, Valores Éticos… Cuéntenme’l casu de dos a los que metieron en Llingua Asturiana porque yera onde había sitiu. ¿Nun resulta muncho más “humano” da-yos de folganza los dos meses que queden de cursu, hasta ver, a primeros del 2022-2023, si la cosa va pa llargo o vuelven pa so tierra? ¿Nun tienen derechu a esi descansu viniendo d’onde vienen y polo que vienen? ¿Hai algún apuru en quitá-yoslos d’en mediu a los tutores que los acompañen, como ye fácil d’entender desempleaos y ensin conflictos de “conciliación”? ¿Nun tarán más contentes les families dando paseos xuntos y esperimentando una primavera tranquila, ensin respigos nin esplosiones, cola esperanza de qu’esti paréntesis inesperáu se cierre en cosa de selmanes? Porque nun tamos falando de xente que cambia de país a la gueta d’un futuru laboral, interesada en facese col idioma del sitiu onde cuenta entamar una vida perdurable. Estes persones, namás puedan, como ye de razón, van tornar pa Ucrania, igual que díbemos facer usté o yo a la inversa. ¡Vacaciones pa estos probes neños, fáiganme’l favor!
Pase usté un bon día y acuérdese de que les ringleres qu’acaba de lleer tán escrites nuna llingua inconstitucional que, oficialmente, nun esiste.
miliorodriguezcueto.wordpress.com
