Esti xueves pasáu, la TPA retresmitió, en directo, una procesión nocturna ovetense que respuende al nome de “la Madrugá”, asina, en bable de les cuenques mineres: gracies a la Cofradía de los Estudiantes por esti guiñu asturianista. A ver si pasa lo mesmo cola “borriquilla” de Ramos y se tresforma en burrina.
Ún nun tien claro qu’esista muncha demanda, n’Asturies, pa esti tipu de programes (en realidá, ta convencíu de que nun esiste), pero, a saber por qué, los medios de comunicación entraron al xuegu de fomentar les procesiones con tantu interés, o más, como ponía la TVE única en tiempos preconstitucionales. Les procesiones, a munchos, paécennos un espectáculu de mal gustu: la música ye un espantu, les figures (con independencia del méritu de la talla) resulten desagradables, los nazarenos meten mieu y, en fin, el conxuntu invita a echar a correr y abrazar l’animismu. En bien de cadenes televisives, viemos, estos díes, persones entrevistaes nes calles de Sevilla, por poner lo más promocionao, diciéndo-y al micro que lo que sentíen nun se podía esplicar. Mentira: toles esperiencies humanes son esplicables. Si nun se puede dar esplicación, o falla’l verbu del animal racional o la supuesta emoción ye una impostura. Ún entiende históricamente eses impostures, esos arrebatos forzaos, allá nel sur de la Península, cuando, nel sieglu XVI, arranque d’estos desfiles de penitentes, había qu’echar a voces que yeres cristianu pa tapar el peligrosu tufín kosher o halal de la familia. Esa necesidá nun la había nel norte, polo visto, y la santa sacose, tradicionalmente, cuando y como toca: en veranu, de día, ente tambor y gaita y ensin esparabanes. Pero, n’España, hai comunidaes alfa y comunidaes omega. Anque la nuestra lleve les dos lletres nel escudu, nun se confunda: somos omega. Alfa ye Andalucía, qu’esporta la so cultura popular con ésitu, que coloniza los territorios omega trunfalmente: más claro, la Madrugá carbayona o eses inverosímiles feries d’abril de Piloña o Llaviana.
El que firma cumplió, va poco, la noble edá de 60 años (¡mete mieu ponelo n’escritu!) y nun s’acuerda de ver, de rapacín o chaval, procesiones nel so Xixón natal. Si les había, nun formaben parte relevante de la vida ciudadana. Pero esti pueblu ye, culturalmente, omega. A la escurecida del miércoles pasáu, diz la prensa, tres hermandaes sacaron otres tantes figures hasta la plaza l’Ayuntamientu playu y escenificaron un alcuentru que, ún nun lo puede evitar, tien un quésiyoqué d’infantil, de xuegu de muñecos, por muncha solemnidá cola que la nueche, los caperuchos, los lexonarios y l’himnu d’España (¿y qué pintará, nes cuestiones de fe, l’himnu d’España?) lu quieran envolver. El párrocu de San Pedro, asomáu al balcón d’un hotel, predicó al fresco del atapecer, que ye una manera de sacar el púlpitu a la calle. A un tiru piedra, taba otru balcón más grande, el de la casa conceyu. Supongo que ye una manera de medir la distancia pa pegar el saltu.
Pase usté un bon día y acuérdese de que les ringleres qu’acaba de lleer tán escrites nuna llingua inconstitucional que, oficialmente, nun esiste.
Cola ayuda de la conseyería d’Educación y Cultura del Principáu d’Asturies
