La nueche carbayona anduvo sobrespuesta a les cámares estos díes d’atrás. Viemos vídeos asignables a escueles cinematográfiques bien distintes. Una d’elles, d’un artista anónimu y xuvenil al que-y sentimos repetir: “¡Vaya asco, vaya asco!”, “¿Qué es esto, qué es esto?” y “¡Que los tengo grabadísimos, joder!”, puede adscribise, ensin violencia (estética), al movimientu Dogma 95; la otra, con un montaxe muncho más profesional y una realización cargada d’intenciones y rica en travellings dinámicos (hailos que dicen que se contrató a Paul Verhoeven pal casu), recibía, por parte d’un internauta insensible a los valores que quier tresmitir la obra, la denominación de “snuff porno policial”. Yo nun tengo visto tanto cine de xéneru como esti críticu y considérome incapacitáu pa discuti-y el dictame o confirmá-ylu, pero dame por pensar qu’esta segunda grabación, que lleva la mosca del ministeriu del Interior arriba a la izquierda, ye menos noticia que documental, y menos documental que publicidá. Publicidá, d’otra manera, que la Delegación del Gobiernu-y fai, de baldre, al alcalde Alfredo Canteli, que bien de xente pensará que ye l’autoridá que manda na Policía Nacional.
Coinciden estes intervenciones policiales grabaes col comienzu de la instalación de cámares nel Antiguo y col anunciu del aumentu de la plantilla de la Policía Municipal, actos que contaron cola inevitable y lóxica presencia de Canteli. “Si hay una cámara, no haces diabluras”, sentenció, lapidariu, con motivu del primeru; y, nel segundu: “Si queremos seguridad, hacen falta policías”. Una vecina del barriu acercose a da-y les gracies pola instalación del artiluxu. A 300 metros, el bustu del capitán xeneral Riego mira p’hacia’l Paragües con xestu foscu.
Yo nun dudo que la presencia policial tranquiliza a bona parte de la ciudadanía. Nun tengo tan claro, en cambiu, que l’ausencia de cámares emburrie a la xente al vandalismu, como puede inferise de la negación de la condicional enunciada por Canteli. Pero a ún da-y por pensar que, uno más otro, lo de los vídeos, más les cámares, más la incidencia del alcalde nel asuntu de la seguridá… too ello xunto y revuelto tresmite una imaxe d’Uviéu, amás de falsa, inconveniente. L’alcalde tiende a sobreactuar, ye’l Jim Carrey de la política asturiana. Nun había nada qu’oponer contra esi proceder si fuere intransitivu, si lu concerniere esclusivamente a él, pero les consecuencies de la so atrevida espresividá afecten al conxuntu de la película, que se titula Uviéu, y puede resentise en cartelera garrando fama de cine quinqui. Y con eso volvemos al arte cinematográficu col qu’empezábemos. Un poco picardía, don Alfredo. Diga usté que pon les cámares pa que los namoraos se besen al pie d’elles, porque Uviéu ye la capital del amor, y, depués, ya, si eso...
Pase usté un bon día y acuérdese de que les ringleres qu’acaba de lleer tán escrites nuna llingua inconstitucional que, oficialmente, nun esiste.
miliorodriguezcueto.wordpress.com
