Cuatro estructures moleculares más o menos organizaes (un chinu d’andares rápidos cola inevitable camisa blanca, un autóctonu oscilante y de mediana edá precedíu de característica tripa sidrera, un perru pequinés vinculáu al autóctonu por una correa y l’ignorante que firma esto) coincidimos nuna esquina de Xixón a una hora cercana al mediudía. El chinu cuspió na cera, el perru mexó una llanta, l’autóctonu reburdió una blasfemia rematada con comentariu etnográficu (“¡Cago’n D…! ¡Estos putos chinos siempre escupiendo na calle!) y a servidor nun-y cayó embaxo l’acontecimientu.
Acababa yo de lleer, una hora enantes, un artículu divulgativu sobre la Mecánica Cuántica, ya ve usté qué coses, y tan mal lu entendí que me dio por pensar que bien podía ser que, xusto onde tábemos los cuatro, pero notra fase vibratoria d’electrones, protones, neutrones, neutrinos, muones y otres coses que l’autóctonu diba alcontrar desaboríes y improcedentes p’acompañar una botellina d’Angelón, nesa otra fase, digo, bien podía ser que coincidiéremos un subsaharianu, un pincher, l’autóctonu inevitable y, claro, yo mesmu; y que’l subsaharianu cuspiere, tamién, na cera, y que l’autóctonu cívicu remungare:
—¡Cago’n D…! ¡Estos putos negros siempre escupiendo na calle!
Y, ¡vaya usté a saber!, lo mesmo había otra vibración un pasu más alantre (esto de pasar de dos universos ya deber ser Teoría de Cuerdes, pamidea) onde nos alcontrábemos un amerindiu, l’autóctonu, un chihuahua de la correa y servidor, alcuentru que diba dar pie a otru comentariu vibrante:
—¡Cago’n D…! ¡Estos putos panchitos siempre escupiendo na calle!
Y otru universu alluendi, veíemonos l’autóctonu, un rapaz escupidor con sangre de faraones na palma la mano, un galgu y esti que firma:
—¡Cago’n D…! ¡Estos putos gitanos siempre escupiendo na calle!
Y etc., etc., hasta un últimu universu temblón, l’oncenu si la Teoría de Cuerdes nun nos engaña, onde nos cruzábemos un rapaz con ocho apellíos d’ente La Pedrera y Mareo, l’autóctonu, un perrín fechu de mil amores candestinos y servidor, y el mozu de castra xixonuda cuspe na cera, y l’autóctonu gruñe:
—¡Cago’n D…! ¡Estos putos rapacinos siempre escupiendo na calle!
Y, en cualquiera de los once universos paralelos qu’enuncia la Teoría de Cuerdes, la opinión pública afirma qu’Asturies ye tierra acoyedora y los asturianos nin sabemos lo que ye discriminar nin refugamos iones con carga eléctrica diferente.
Pase usté un bon día y acuérdese de que les ringleres qu’acaba de lleer tán escrites nuna llingua inconstitucional que, oficialmente, nun esiste.
miliorodriguezcueto.wordpress.com
