Suscríbete La Nueva España

La Nueva España

Contenido exclusivo para suscriptores digitales

Xuan Xose

Tonada triste la mio ciudá

La desertización comercial de las calles asturianas

"Les mios ciudaes", debería dicir, porque en realidá son la mayoría les ciudaes d’España, masque non toes.

Atravieses les cayes del centru, onde siempre tuvieren les tiendes y les oficines con más movimientu y clientes, y lo que ves ye una llaceria que mueve a murnia y llástima: abonden los locales cerraos, y los lletreros: "Trespásase", "Alquílase", "Lliquidación últimes esistencies", "Lliquidación por xubiliación", "Véndese. Teléfonu…". Y hai unos meses o unos años, aquellos escaparates, agora vacios, acasu tapaos con papeles qu’atapecen l’interior del llocal, en munchos casos enllenos de pintaes o con anuncios apegaos a un "Prohibío poner anuncios, responsable…", aquellos escaparates llucíen vistíos femeninos, traxes masculinos, zapatos, reloxes y cadenes, perfumes, mentantu son agora "campo de soledad, mustio collado". Y nun se piense que se trata d’una "destrucción creativa", non. De xemes en cuando, ye verdá, ábrense tiendes nueves, pero por caúna que lo fae piésllase una mozada d’elles.

Dirixir la mirada al interior ye un emburrión más a la señardá: ye difícil, a cualquier hora, ver dientro los establecimientos curiosos o compradores. Ye más, a vegaes nin siquier fai falta mirar dientro: l’empleáu o’l dueñu tán a la puerte, mirando la caye, falando per teléfonu, esperando acasu por un visitante.

Y lo que s’aprecia ye que tán esapaecíos o tán a puntu esapaecer los pocos negocios que quedaben de capital llariegu, y que lo nuevo que puebla les víes son franquicies y/o multinacionales.

Y eso ye nel centru la población, onde sigue circulando un númberu relativamente altu de persones, menos, en tou casu, qu’enantes de la pandemia. Caleyando pelos barrios aprovez la tristura: equí malapenes hai nueves apertures, lo que tranca faelo casi siempre pa siempre, y los anuncios de venta, alquiler o trespasu van tomando, mes tres mes, añu tres añu, el color apagáu de les hores más grises del iviernu. Nun ye raro ver tiendines qu’aguanten cola compra de dalgún veceru o casi ensin nengún, y ye fácil pescudar, pola edá del que les atiende, que lo faen pa siguir pagando les cotizaciones (con perres que se saquen non de les ganancies, sinón de los aforros, munches vegaes) hasta la yá cercana xubilación (que seguramente, nel so casu, será d’auténticu "xúbilu", reviviendo la etimoloxía de la pallabra).

Lo que sí pue notase ye que, xunto cola paulatina esapaición de negocios qu’atendíen a xeres que güei tán cayendo en dususu polos particulares, les ferreteríes, per exemplu, bilten otros nuevos, munchos dedicaos a la salú, la belleza o a l’atención del cuerpu: dentistes, fisioterapeutes, ximnasios, esteticistes; dalgunos son de precios baxos, como delles peluqueríes o llocales dedicaos al cuidáu d’uñes, munches vegaes atendíos por xente de nacionalidá estranxera.

Al mio talantar, esa desertización de les cayes vieno pa quedase. Les causes son varies y conocíes: la falta perres, aumentada nesti caberu tiempu pola inflación; los servicios per interné, que munches vegaes ufierten más variedá, meyor serviciu y meyores precios que’l comerciu tradicional; les grandes superficies, que presenten más comodidá pa llegar y que, incluso, disponen en munchos casos de servicios d’ociu o d’entretenimientu y guarda pa los rapacinos.

Si estes son les causes, y paecen poco remediables, los ayuntamientos collaboren tamién nesa desertización, non solo colos impuestos, sinón con decisiones enquivocaes (que creen ellos beneficioses por "modernes"), como les prohibiciones de circulación o aparcamientu, que, lloñe de lo que se diz pretender, una ayuda al comerciu, lo que faen ye espulsar a les grandes superficies o centros comerciales a los posibles compradores, especialmente a los de mayor capacidá económica y disponibilidá pa los desplazamientos.

Y una nota final. Si lo que venimos describiendo ye xeneral, nun ye universal, o polo menos, yelo en distintu grau de lo que ye equí n´Asturies. Una observación ente inocente y sorprendida d’un llicenciáu que se desplazó a vivir a Madrid pa facer un máster y trabayar: "Yo creí que n’Asturies tábamos bien, pero cuando veo’l movimientu equí, en Madrid, del comerciu y el so puxu, y lu comparo con Asturies y los sos cierres y decadencia, doime cuenta de lo que somos en realidá".

Como diz l’Evanxeliu de San Matéu del obispu Don Manolín: "El que tenga oíos p’atolenar, atolene".

Compartir el artículo

stats