El amigo invisible

–¡Meca, qué detalle!

–...

–¡Yá, ho! pero nun sé pa qué te molestes, siempre tás igual.

–...

–Y yo a tí, ¿oíste?

–...

–Sí, sí. Apréciote muncho porque siempres tas ahí, nes dures y nes madures. Eso ye así.

–...

–Que sí, oye, que a veces dasme la turra, con tus neures, tus frases obsesivas…

–...

–Apitezme estrellate, la verdá, cuando lo ves tou negro y resaltes lo malo namás.

–...

-Pero ye igual, ¿oíste? Presta sentase contigo a charrar y liberase del qué dirán.

–...

–Yá, yá. Nun sé por qué-yos fastidia que yo tenga amigos imaginarios, como si ellos nun tuvieren Facebook…

–...

–Claro. A ver si cree el oveya del mi primu que los sos trés mil quinientos amigos son amigos de verdá… ¿oíste?

–...

-¡–Sí, ho. Da gustu charrar contigo. Oye, una conversación inteligente de vez en cuando…

–...

–Y más nestes feches con esi rollu de los regalos nel arbolín y la familia feliz…

–...

–Tu entiéndesme meyor que naide, siempres atines con tolos regalos…

–...

–Colos otros, tou ye por comprisu. Y punto.

–...

–Yes el putu amu, dígotelo como lo siento.

–...

–Con tu voz silenciosa y esa chispa que tienes…

–...

–Non, en serio, a veces lo que decimos póngolo por escritu y flipo.

–...

–Y nun fagas casu a la tu cuñada, tú nun yes menos que naide. Y punto.

–Tú tienes que llevate bien conmigo y yo contigo. Juntinos, ¿oíste?

–...

–La unidá, yá lo dixo’l Rei nel discursu de Navidá.

–...

–Tanta hipocresia, tantes felicitaciones y depués por detrás…

–...

–Tantu dar vuelves y a la fin, si quies atopar al amor de la to vida tienes que mirate al espeyu.

–...

–Non, non, dígotelo en serio.

–...

–Yá, ho.Tienes les tos coses como tol mundu, pero yes bien detallista.

–....

–Apréciote muncho porque siempres tas ahí, nes dures y nes madures.

–...

–Ye lo que hai, amigu. ¡Ye lo que hai!

www.parandoenvillalpando.com

Suscríbete para seguir leyendo