Suscríbete La Nueva España

La Nueva España

Contenido exclusivo para suscriptores digitales

Xuan Xose

¿Seca o cambiu climáticu?

"El Club Marítimo Astur busca navegantes" titulaba esti diariu, con una evidente metáfora. Y aclaraba dempués: "La sociedad echa en falta el relevo generacional para recuperar su fuerza".

Si vustedes anden sollertes siguiendo esti tipu d’informaciones, saben de sobra que tamos delantre d’un problema xeneralizáu. Da igual que se trate d’asociaciones vecinales, de clubes deportivos, de peñes escursionistes, d’asociaciones caritatives, d’entamadores de festexos, el problema ye siempre’l mesmu: nun hai relevu xeneracional. L’Asociación vecinal de Candás dicíalo d’una forma dramática hai meses, afirmaba que taba a puntu d’esapaecer y clamiaba: "La xente nun s’involucra".

Pero nesi nun topar relevu pa rellenar los furacos que se van produciendo nes asociaciones y nos clubes, d’una u otra mena, hai daqué vector fundamental: ye la xente menor de cincuenta o cuarenta años la que nun s’avera al asociacionismu, la que nun tien compromisu cola acción colectiva y estable nuna organización social. Cuando vemos les fotos de les directives d’eses asociaciones lo normal ye que les persones tengan yá, por dicilo de forma delicada, "una cierta edá", ye perdifícil ver cares relativamente moces nelles.

¿Qué ye lo que ta pasando y cuála ye la causa? ¿Son menos solidaries les nueves xeneraciones? ¿"Pasen más de les coses", son menos constantes? ¿Suponen que, al igual que la enseñanza, les pensiones, la sanidá…, el mundu que los rodea, nuna pallabra, va siguir tando ehí siempre como ta agora? ¿Tienen otres formes de solidaridá o xuntura a favor de causes pero nun les executen de forma permanente sinón de forma ocasional y a través de plataformes dixitales, evitando les reuniones fixes, los discursos reiterativos, les perdes de tiempu? ¿Son, en xeneral, más individualistes y despreocupaos de lo común?

Nun tengo rempuesta. Probablemente son dalgunes d’estes causes u otres, pero lo cierto ye qu’esa ausencia de relevu ye un signu de los tiempos.

¿Ye una seca temporal? ¿Un cambiu climáticu dafechu? Talanto qu’esto últimu.

Compartir el artículo

stats