Opinión

Si muerre l’aldea, muerre’l país

Discurso de la entrega del premio a "Os bos e xenerosos 2024", concedido por la Fundación Eduardo Pondal de Galicia

Nun ye un tópicu dicir, anque suene asina, que recibo esti premiu como un gran honor, con muncha allegría y tamién como una obligación.

Sicasí quiero dici-vos qu’en mio casu recíbolu tamién como una paradoxa –los bos e xenerosos son los que me lu dan, nun el que lu recibe– y tamién como una desaxeración, porque, como munchu, nun paso de ser bien intencionáu y perseverante.

Por eso la concesión del premiu oblígame, comprométeme, a ser meyor, a ser bonu de verdá y xenerosu, y a tar cada di más allegáu dende Asturies a esta Galiza que prémiame güei. Recibo’l premiu asina como un préstamu, como un anticipu, casi como una hipoteca, y prometo siguir aportunando na razón y el motivu que me traxo a O Couto va munchos años a los primeros alcuentros d’aldees con iniciatives y que, paezme, ta detrás de la distinción que daisme güei.

Va tiempu que toi enfotáu en busca-y a l’aldea –esa pequena e intelixente estructura protourbana en vies d’extinción– el sitiu de prestixu que-y correspuende na sociedá contemporánea y facer asina que les aldees sían llugares onde atopar una vida plena. Nes aldees, nacieren los nuesos antepasaos, el paisaxe llabráu, la cultura del país y la naturaleza fecha y caltenía pela xente.

Quiero dicivos tamién que recibo’l premiu, si acasu, en calidá de médium aldeanu. Ya sabedes quién son los médiums: esos que nes sesiones d’espiritismu comuniquen a los que güei viven n’aldea colos qu’agora viven nos campusantos pero vivieren equí per sieglos y dexárennos la so memoria escrita na terra.

Devolve-y a l’aldea una vida y una economía propies y bien calteníes nun ye asuntu menor. Nun podemos escaecer que, nel casu d’Asturies, más del 80 per cientu del país tuvo dende sieglos iguáu y atendíu peles aldees. El país equí, en Galiza o n’Asturies, ficiéronlu más que naide les aldees. Por eso tamos obligaos pola historia a recuperar y actualizar el llegáu de los nuesos antepasaos, en reconocer bien cedo el saber facer, el venceyu de la comunidá cola tierra, y amalgamalo bien pa llevalu al futuru. Si muerre l’aldea, muerre’l país.

Y nesi camín, nesa intención, ye mui prestoso qu’atopemos en Galiza, y n’O Couto al amparu de la Fundación Eduardo Pondal y del so llar, el puntu d’alcuentru con Asturies y Portugal pa siguir faciendo xera ente nós. Les sabies, bones y xeneroses aldees del pasáu merecen que güei nós siamos bonos y xenerosos con elles pa devolve-yos la so razón de ser y faceles tamién modernes y cosmopolites. Pa esi llabor podéis contar conmigo y neso sí, de xuru, prométo-vos ser bonu y xenerosu y tar a l’altura del premiu que güei recibo.

Suscríbete para seguir leyendo