Opinión

Construyir país

El 8 de setiembre ye una fecha que debería tar llamada a reflexonar sobre lo que fuimos, somos y queremos ser les asturianes y asturianos. Como comunidá humana diferenciada y singular tenemos la nuestra problemática particular y los nuestros retos específicos. Hemos ser conscientes qu’un territoriu pequeñu, xeográfica y demográficamente, como Asturies tien mui poco pesu nel contestu estatal, lo que conlleva una debilidá política que frena’l nuestru desarrollu. Sociedaes como l’asturiana necesiten un poder políticu real y efectivu que seya quien a poder intervenir en tolos asuntos que-y afecten. Precisamos un autogobiernu amañosu que respuenda a les nuestres necesidaes y un Estatutu d’Autonomía modernu y competencialmente mayor qu’aumente la nuestra capacidá d’actuación política.

Tenemos per delantre un nuevu periodu de sesiones nel que van tratase asuntos perimportantes qu’afecten al modelu de sociedá: turistificación escesiva, polítiques de vivienda y ameyoramientu de la sanidá pública, son tres de les cuestiones nes que vamos incidir prioritariamente, pa les que vamos proponer acciones valientes y visión de país, dalgo que pa nós ye imprescindible. Nel planu esternu, hemos ser quien a instaurar nes rellaciones col gobiernu central l’axenda asturiana, que ponga nel centru del debate temes como la financiación autonómica, la industria y les infraestructures.

Creyemos que ye’l momentu de construyir país en tolos campos, tamién nel políticu, con estructures d’obediencia esclusivamente asturianes que namás respondan ante la ciudadanía d’esta tierra. Con esti enfotu escomenzamos el nuevu cursu políticu, que naguamos seya lo más positivu y granible pal conxuntu de la sociedá asturiana.

Suscríbete para seguir leyendo

Tracking Pixel Contents